Mynta yn bishar ka High Court, ia ka jingiap u pulit Marbaniang

Shillong, 20 Naitung:
Ka Kashari High Court kan sa shim bishar lashai ka sngi ha ka por 10:30 baje mynstep ia ka jingujor jong kiba haiing hasem jong u Bah PJ Mar banbiang uba la khlad na ka jingsuba ha ki runar ki bnai ba la dep ha Pathar khmah Police Outpost.
Kane ka jingbishar kan long hadien ba kiba haiing hasem jong u Bah Marbaniang ki la ujor sha ka Kashari hadien ba ka jingtohkit ba la thung da ka sorkar jylla ka Special Investigation Team (SIT) ka la pynslem ia kane ka jingtohkit wat hadien ba ka kut ka por, hynrei ka dang iai pan por shuh shuh.
Haba iakren bad ka President ka CSWO ka Kong Agnes Kharshiing ka la  iathuh ba I kmie jong u Bah Marbaniang Kong D Marbaniang I la ujor sha ka Kashari High Court hynne ka sngi ban dawa ba kan tuklar ia kane ka kam ban hukum ban thung da ka jingtohkit da ka CBI.
“I la thep ia ka jingujor mynta ka sngi bad lashai ka Kashari kan shong bishar ia kane ka kam”, la ong ka Kong Kharshiing.
Kham mynshwa, ka CSWO  ka la dawa ba ka kaiphod jingtohkit jong u Bah J Rymmai u Commandant  ka 6th Battalion halor ka jingiap jong u Sub Inspector ka Patharkhmah Outpost u Bah PJ Marbaniang dei ban sei madan mardor namar ba u la dep phah sha ka sorkar.
Ki paidbah ki don ka hok ban tip ia ka jinglap jong ka jingtohki kaba la pynlong ia ka jingtohkit nyngkong shwa ba ka sorkar kan thung ia ka Special Investigation Team (SIT), ka la ong ka CSWO.
 Ka jinglap kane ka jingtohkit ba nyngkong ka long kaba donkam bha na ka bynta ban buddien ia ka jingjia halor ka jingiap jong u Bah Marbaniang, la ong ka President ka CSWO ka Kong Kharshiing.
Ka la ther, ba kumno ki pulit ki sted ban kam ba ka dei ka jingjia ba shu siat hi haba kim pat tip thikna ia ka jingshisha.  
Lah ban kdew ba ka jingiap jong u Bah Marbaniang ka don jingiadei bad ka jingkhang dewiong ka NGT namar ba utei u pulit ophisar u la khlad tang hadien ba u la bat ia ki trok kit dewiong beain ki bym don ki kot ki sla kiba biang.
Ia ka met jong u Bah Marbaniang, uba peit ia ka Patharkhmah Police Outpost la lap ha ka miet 24  tarik Kyllalyngkot hadien ba u la bat 32 tylli ki trok kit dewiong beain ha katei ka thain.