Mynta yn bam smai U Modi, khlem paw kyrteng U Purno

Shillong, 25 Jymmang:
Lashai ka sngi, U Narendra Modi, un bam smai, kum u myntri rang bahduh ba thymmai jong ka India. Hynrei haduh mynta, ki dak ki shin, kim kdew satia, la U PA Sang ma, uba dei u nongialam jong ka Nationalist Peoples Party (NPP), un ioh kam myntri ne em, ha katei ka jingpynsmai myntri, ha kaba yn wan ban sakhi, da ki nongialam na baroh ki Ri, kiba hap hapoh ka South Asian Association for Regional Cooperations (SAARC).
Ka don ka jingia kren, ha kaba ka BJP, kam don

jingmut satia, ban ai shuki myntri, ia U PA Sangma, wat la ka don ka jingiakren ia u myntri rangbah jong ka Naga land, U Neiphiu Rio, ba un lah ban ioh ia katei ka bhah ha ka jingbamsmai, kaba lashai ka sngi.
Ka jingbamsmai, kan long lashai ka sngi, ha ka por 6baje janmiet, ha kaba la sngewthuh, ba ka kmie jong U Modi ruh, ka Hiraba, kan lah ban don lang, ha katei ka jingbamsmai jong u khun jongka, ia ka shuki myntri rangbahduh. Ka jingpynsmai, kan dei kaba heh bha, ha kaba la khmih lynti, ba kin don kumba 3hajar ngut eiei, ki ban sakhi, ha katei ka jingbamsmai myntri rangbahduh jong U Narendra Modi.
Ha kawei pat ka khubor, la iathuh ba kin don bun ki Lat, kiba la thung ha ka por synshar jong ka Congress, ki ban hap ban iehnoh, ia ki kam jongki bad kitei ki kynthup naduh U Lat jong ka Gujarat, U Kamla Beniwal, uba la ia tyngkhuh bunsien bad U Modi, ha ka por, ba u dang long myntri rangbah ha katei ka Jylla.
Ha ka dong shatei lam mihngi ruh, la shim ba U Lat jong ka Meghalaya, U KK Paul, un dei uwei na ki ban shah weng noh, ha ki khyndiat sngi ban sa wan, nangta U Lat ka Assam, U JB Patnaik nalor kiwei de, kiba la khmih lynti, ba kin hap ban iehnoh, ia la ki jong ki kam jongki, khamtam ia kito kiba dang dei ban pyndep slem, ia ka por treikam jongki. Nalor kiwei pat kiba kham hakhmat bad kiba lah ban ngat ha ka jingshah weng, kin kynthup ruh ia ka Lat jong ka Kerala, ka Sheila Dikshit, kaba dei ka myntri rangbah barim jong ka Delhi.