Mynta yn bam smai ki MDC GHADC, 21 tarik ka elekshon Chairman

Shillong, 18 Risaw:
Lashai ka sngi ka 19 tarik u risaw kan don ka jingpynbam smai ia baroh ki MDC ba dang shu shah jied thymmai ka GHADC ha kaba yn pynbam smai ia ki da u Deputy Commissioner ka West Garo Hills District. Hadien kata kan don ka elekshon ia ka kam Chairman ha ka 21 tarik mynta u bnai, bad hadien ba la dep ia ka elekshon Chairman kan don sa ka elekshon ban jied CEM.
Lah ban kdew ba na ki 29 ngut ki MDC ha GHADC kiba la jop ha ka elekshon ba dang shu dep ka NPP ka dei ka seng kaba la ioh bun ngut tam ki MDC kata 10 ngut, ka Congress ka la ioh 7 ngut, ki MDC shimet 7 ngut, GNC 3 ngut, BJP 1 bad NCP 1. Ka NPP mynta ka la thaw ia ka kynhun synrop ban synshar ha GHADC kaba la tip kum ka Garo Hills Progressive Alliance (GHPA) bad ha katei ka kynhun ka don ka NPP, BJP, bad GNC kiba la kot sha ka 14 ngut, hynrei ka NPP ka la kam ba ki don ruh ki MDC shimet kiba la wan ban pyniasoh sha katei ka kynhun kaba la thikna ia ban ioh ia ka nombar kaba biang ban don ha ka kynhun synshar.
Hynrei shisngi shuwa ba ki MDC ka GHADC kin shah pynbam smai, la ioh jingtip ba ki don 3 ngut ki MDC shimet kiba la mh noh na katei ka kynhun synrop bad la ong ba mynta ka sngi ka la don ka jingialang jong ki (MDC shimet) ha ingsah u Rupert M Sangma ha Tura uba dei ruh u MDC shimet na Tura Konstitwensi bad la ong ba ha katei ka jingialang ki la shim ia ka rai ban ym kyrshan iano iano ruh hynrei kin shong beit hapdeng naba kim kwah ban kyrshan ia ki kynhun kiba donlang u MDC u bym dei riewlum.
Hynrei haba ia kren bad u nongthohkhubor mynta ka miet ki nongialam ka NPP ki la ong ba kam shym la don kaba kum kata ka jingmih noh ki MDC shimet napoh ka kynhun jong ka GHPA, hynrei ki la kam ba ki dang don shuh shuh ki MDC shimet kiba la wan tyrwa ban ia treilang bad ki. Ha katei ka jingiakren bad uwei na ki nongialam ka seng NPP u la ong ba mynta ka miet ka dang don ka jingialang jong ki MDC kiba don ha katei ka kynhun ha ingsah u Purno A Sangma ha Tura ban ia kren bad ki kam kiba dang hap ban dang iaid lynti.
Ka NPP ka la pynthikna ba kam don jingartatien eiei ruh em ba kan ioh thaw sorkar ha GHADC bad ka la pynthikna ruh ba kan jop suk ia ka elekshon Chairman ka ban long ha ka 21 tarik mynta u bnai bad ka la kam ba kan jop suk ruh ia ka elekshon CEM ka ban sa pynbna hadien. Katei ka kynhun ka la jied ia u MDC ka NPP na Nogorpara Konstitwensi u Boston Marak ba un shimti kum u Chairman ka GHADC katba ia ka kam CEM pat ka la pynthikna ba un dei beit u Conrad Sangma u khun jong u Purno A Sangma u ban long kum u MDC ba shu sieh.