Mynta u bnai yn iakren Tenancy Bill ki RS Sor bad khapsor

Shillong, 14 Naiwieng:
Ka Synjuk Ki Rangbah Shnong (SKRS) ki la rai ban khot jingialang jong baroh ki Dorbar Shnong hapoh bad ha khapsor Shillong ban iakren iatai ia ka Meghalaya Regulation of Landlords and Verification of Tenant Bill, 2013.
“Ngi la thmu ban pynlong ia ka jingialang ha kaba kut jong une u bnai Naiwieng”, la ong u president ka SKRS Bah Teibor Shanpru hadien ba la iakynduh ki nongkitkam jong ka Synjuk ha kane ka sngi Palei.
U Bah Shanpru u la ong ba kin shim ia ka rai lang ha kane ka jingialang jong baroh ki Dorbar Shnong shwa ba kin shim ia kiwei ki lynti ban pyrshah ne pdiang ia kane ka Bill.
Katkum ka jingong u Bah Shanpru, ka Executive Committee (EC) ka la kyntait ia ka Tenancy Bill namar ba ka long kaba dkoh nadong shadong.
Haba ka sorkar ka la kam ba kane ka Tenancy Bill kan iarap ban tehlakam ia ka jingwang rung ki briew nabar, hynrei ka Bill kam kren ei ei ia kata, la ong u Bah Shanpru.
“Kane ka Bill ka la pynpoh dor ia ka bor jong ki Dorbar Shnong bad ka bym lah ban pdiang da lei lei ruh. Ngi dei ban sngewthuh ba ki dorbar shnong ki treikam katkum ki riti dustur”, la ong u Bah Shanpru.
U president ka SKRS u la ong ba kane ka Tenancy bill ka ieng pyrshah ia ki riti dustur jong ka jaitbynriew.
Ka SKRS kham mynshwa ka la kyntait ban leit iashim bynta ha ka jingialang ba la khot da ka sorkar ban iaphylliew halor kane ka Bill ba la khot da u Myntri Rangbah u Mukul Sangma.
Ka Synjuk ki Rangbah Shnong Nongthymmai Pyllun, Shillong kaba kynthup 13 tylli ki Dorbar Shnong kynthup ka Nongrim Hills, Nongshilliang, Pohkseh, Rynjah, Lapalang, Lumbatngen, Lumiawblot, Demthring, Nongkhyriem, Lawjynriew, Lumsohphoh, Lumdiengsoh bad Lumpyngngad, ki la pyrshah ia kane ka Bill.