Mynta shong kyllain mynngor, ba kwah tulop heh ki babu SSA

Shillong, 19 Nohprah:
Ka jingiakhih jong ki nonghikai SSA hapoh ka lama jong ka All Meghalaya SSA School Teachers’ Association (AMSSASTA) kan iaid beit shakhmat katkum ba la pynbeit ban pyrshah halor ka jingpyniapher tulop ka sorkar ia ki nonghikai SSA.
Ka sorkar ka la pynmih ruh ia ka Oder no MEG/SSASMAM/FIN/19/2009/118-A, ha ka 31 tarik Risaw 2016 katkum katei ka hukum, ka sorkar ka phiah kyrdan ia ka jingsiew tulop ia ki nonghikai SSA ha ka jylla kata hapdeng ki kita kiba la pyndep ia ka jingdonkam katkum ka NCTE Norms kata ka mut kiba la ioh ia ka 45% ha ka Class XII bad kiba la pyndep ia ka Training De.el.ed/B.ed bad ia kito kiba dang duna ia kine.
Ia kito ki nonghikai kiba la pyndep katkum ki kyndon, ka sorkar ka ai ia ka jingsiew kaba 19,044 shibnai,ha ki SSA LP School bad 20, 493 shibnai, ha ki SSA UP School.
Hynrei ia ki nonghikai kiba duna ia kine ka sorkar kan siew 13,335 shibnai, ia ki nonghikai SSA LP school bad 14,392 shibnai ia ki nonghikai ha ki SSA UP School.
Kumta ka seng, ka kyntu ia ki para nonghikai SSA jong ka jylla Meghalaya ba kin iawan khnang khnang sha ka jingiakhih da kaba shong kyllain mongor kaba la pynbeit ha ka 20 tarik mynta u bnai ha Additional Secretariat Parking lot, ka ban sdang ha ka por 11 baje mynstep haduh 4 baje janmiet, ban pynbor ia ka sorkar ba kan siew mar katjuh ia baroh ki nonghikai SSA.