Mynta sdang pakhang shnong ha Jaintia

Jowai, 19 ‘lyngkot:
Ka pakhang shnong, ba la khot pynlong da ki sengbhalang bapher, kan sdang lashai ka sngi, ha ka por 5baje mynstep bad kan bteng haduh ka 21tarik ha ka por 5baje mynstep. Katei ka dei ka pakhang ba 24 kynta, ba la khot pynlong da ki seng bapher, na ka bynta ban dawa halor ka kaiphod, kaba iadei bad ka jingshah siat ha Mookhep, kaba dang buhrieh da ka sorkar Jylla haduh mynta.
Ka jingshah siat ha Mookhep, ka la jia ha ka 24tarik Nailur 2014, ha kaba arngut ki briew ki la iap, na ka daw jong ka jing ia khih ban pyrshah halor ka jingkhang tih dewiong ha Jaintia Hils.