Mynta sdang ka pakhang surok ba ‘3 miet’ ki sengbhalang

Shillong,3 Nailur:
Hadien ka pakhang shnong kaba 12 kynta ba ki sengbhalang ki la khot mynhynnin ka sngi, ki la pynbna biang sa ka pa khang surok miet kaba lai miet kynthih ka ban sdang naduh lashai ka miet haduh ka miet sngi thoh dieng.
Katei ka pakhang surok ba ki sengbhalang ki la khot kan treikam naduh ka por 9 baje mynmiet ha duh ka por 5 baje mynstep bad kan iaid beit kumtei ha baroh ki lai miet ba la pynbna. Ki sengbhalang ki la shim biang ia katei ka sien jam ban pynlong da ka pakhang surok miet dei hadien ba ka sorkar kam patiaw eiei ia ka jingdawa ILP, wat hadien ba la khot da ka pakhang shnong kaba 12 kynta.
Lah ban pynkynmaw ba ki Sengbhalang ki la byrngem ba kat bym pat ioh ILP kin bteng ia ki jingiakhih jong ki kiba khlem sangeh kaba kin dang iai pynbna shaid shi shaid.
Mynta ka sngi, la iohi ba ka tnad pulit kam shym la khein sting ban pahara ha ki thain Motphran bad ki khapsor ha kaba ki pulit ki iaid kylleng kylleng ka nongbah da ki kali pahara kiba kham jur, khamtam, ynda la kem dum.
Mynhynnin ka miet u nongthohkhubor u la iaid sha katto katne ki jaka ha sor Shillong ha kaba u la iohi ba bun ki kali Patroling ki shang tawiar ia ki khapsor bad kumjuh ruh ha ki thain Motphran bad Them Iew mawlong. Ka jingtalasi ia ki kali kiba iaid ba ieng kam pat shym la kut satia ha kaba mynhynnin ka miet ki pulit ki la pynsangeh ia ki kali kat kiba iaid lynti lyngba ka Anjalee Petrol Pump.