Mynta sdang ia ka tamasa Mawbynna ha Mawphlang

Shillong,30 Lber:
Lashai ka sngi ka 31 tarik u Lber u Lat ka jylla u V.Shanmuganathan un plie paidbah ia ka tamasa mawbynna ka ban long lai sngi lynter ha ka shnong tynrai ha Maw phlang ha ka por 12:30 baje mynsngi. Katei ka tamasa kan kut haduh ka 2 tarik u iaiong. Kumba long mynta ka jingpyn khreh ia katei ka tamasa ka la biang nadong shadong ha kaba la iohi ba ki 11 tylli ki Hima mynta ki la dep ban pynbit pynbiang ia ki ing hima jong ki bad kumjuh ruh ki dukan ki la dep pynkhreh lut na ka bynta lashai.
Ha katei ka tamasa kaba lai sngi kin don bun jait ki jingpyni nam ia ki tiar tynrai,ka put ka tem tynrai ka rwai ka siaw bad kin don ruh bunjait ki jingiakob ha ki jingialehkai tynrai bapher bapher. Kan don ruh ka jingiakob ing Hima ha kaba ka ing hima kaba itynnad tam kan ioh ia ka khusnam kaba T.1 lak tyngka. Kin don ruh ki kynhun riewlum na Australia ki ban wan ban pyni ha katei ka tamasa ia ka rukom long tynrai jong ki. Ki nongialam ka Khasi Heritage Conservation Forum ki la kyrpad ia ki paidbah ba wan ha katei ka sngi ba kin bud beit bud ryntih ia ka rukom pyniaid kali ha katei ka sngi ban lait na ki jingkhapngiah.