U heh spah ka Russia, u dang shna mynta ia ka Ri kaba thymmai bad katei kan long beit ha ki haw haw jong ka pyrthei.
Katei ka jingthmu, ka long ban phah ia ki million ngut lem bad kiwei ki jingdon jingem, ba kin shong kin sah ha katei ka haw haw, namar ba la shim, ba ka jingdon briew, kan sa duh jait na kane ka pyrthei ha ki pateng ban sa wan.
Katei ka Ri, kan don la ka jing ka lama, la ka jong ka national anthem bad ki don mynta 3lak ngut kiba la sei soi kyrteng ba kin shong ha katei ka ri kaba thymmai.
Ha ka jingiakren bad ka kotkhubor kaba na London, The Sun, uwei na ki dkhot jong ka kynhun Asgardia, u ong ba u khun bynriew, un hap ban mih noh dalade hi na kane ka pyrthei.
“U khun bynriew, un sa duh jait noh na kane ka pyrthei lane ka sngi, kan sa bthei ha kawei ka sngi bad ha katei ka por, u khun bynriew un sa jah lut khoit”.
La seng naduh u snem 2016 bad katei ka Ri, kaba yn tip Asgardia, ka dei ka jingmut kaba wan na u heh spah duh jong ka Russia, U Igor Ashurbeyli bad ka jingthmu, ka long ban shna iing ia 15 million ki jingthaw jong ka pyrthei bad la iathuh ba kawei kawei ka iing kan shongdor £100billion bad kan dei ka jingim kaba pher shibun bah, ha ka haw haw. La iathuh ba ka projek, kan sdang ha u snem 2045, ha kaba yn pynkha ruh ia ki khyllung, ki ban im ha ka haw haw.
Kan shongdor £90 ban mynjur na bynta katei ka jinglong nongshong shnong ha katei ka ri, kaba don ha ka haw haw bad la iathuh ba ki don mynta ki briew kiba na ki 200 tylli ki Ri bad ki Jylla bapher, kiba la mynjur ba kin long ki Asgardian bad lada katei kan trei kam kumta ka asgardian, kan dei kawei na ki 172 tylli ki ri, ka ban dei ka ri kaba bun briew tam.
Hapoh ka 10 snem, la iathuh ba ka Asgardia, kan ioh briew haduh 150 million ngut bad hadien kata, yn sa sdang noh ia katei ka Ri thymmai, ka ban long la kumno kumno kum ka iing lieng jong U Noah, tangba kan dei ka ban tyllun beit ha ka suin bneng.
Phi don ban ong eiei?