Mynta niew vote ha Tura, jop u Conrad ne ka Dikkanchi

Shillong, 18 Jymmang: Ka rai mano ban jop ne ban rem na ka bynta ka elekshon MP shiteng samoi na ka bynta ka Tura Lok Sabha, kan long lashai ka sngi. Ka jingniew vote kan long naduh ka por 8 baje mynstep.
Ka jingpoi ki nong thep vote ka la kot sha ka poi 77.66 percent. Ki nongthep vote kynthei ki poi 77.83 percent katba ki shynrang ka long 77.48 percent.
U Chief Electoral officer (CEO) u Bah Frederick Roy Khar kongor u la ong ba ki jaka niew la buh ha William nagar, Baghmara, Resu belpara, Tura bad ha Ampati bad ha baroh kine ki jaka niew vote la buh kor ring dur CCTV.
Ha ki 5 tylli ki District jong ka ri lum Garo, ka South West Garo Hills ka dei kaba wan thep vote bun tam kaba la poi sha ka 83.74 % , ka North Garo Hills: 77.29 % ,West Garo Hills: 70.63 % , East Garo Hills: 72 % bad ka South Garo Hills: 74.86 %.
Napdeng ki konstitwensi ka Mahendraganj ka la poi 84.32 % ki nongthep vote. Kiwei pat ki long ka Kharkutta 78 %, Mendipathar 77.51 %, Resubelpara 76.69 %, Bajengdoba 76.77 %, Songsak 75.57 %, Rongjeng 75.46 %, Williamnagar 67.79 %, Raksamgre81.22 %, Tikrikilla 77 %, Phulbari 79.09 %, Rajabala 83.34 %, Selsella 83.78 %, Dadenggre 74.84 %, Tura North 71.63 %, Tura South 70.73, Rangsakona 80.07 %, Ampati 83.26 %, Mahendraganj 84.32%, Salmanpara 83.57 %, Gambegre 79.39 %, Dallu 80.56 %, Siju 75.06 %, Chokpot 73.26 %, bad ka Baghmara 76.06 %.
Ka rai lashai kan long kaba donkam bha ia ka bynta baroh ar ngut kiba ialeh ia kane ka elekshon. Na ka bynta ka NPP kan long ka jingtynjuh la kan dang lah ne em ban khie khlieh katba ia ka Congress kan long kum ka jingiathuh lypa na ka bynta ka jingiaid lynti jongka ha u 2018.
U kyrtong ka NPP u Conrad K Sangma lada un jop kan long ka khubor ba bha ia ka party khamtam haba u la shimti ia ka kam nongialam ha ka ri katba ia ka kyrtong ka Congress ka Dikkanchi Shira kan ka khubor ban pynskhem ia u lok jongka u Mukul Sangma uba dei u Myntri Rangbah ka jylla ha ka jingiaid lynti jongu ban ialam ia ka party ha kane ka jylla.
Ia u Conrad la kyrshan da ka BJP, UDP, GNC nalor ki MDC katba ia ka Congress la kyrshan da ki MLA kynthup MLA shimet bad baroh ki MLA ka party bad ki MDC.