Mynta lum dorbar ka KSU ha Nongtrai na ka ioh kam ha Lafarge

Shillong, 19 Nailar:
Ki nongshong shnong jong ka shnong Nongtrai hapoh ka jingialam jong ka KSU ki la shim ia ka rai ban pynlong hi noh ia ka Dorbar paidbah lashai ka sngi saitjaiñ jong ka taiew bad ban shim ruh ia ka rai ia khih namar ka jingbym lah ka Lafarge Umiam Mining Pvt Ltd ban pynurlong ia ka jingdawa jong ki ban thungkam ia ki trai shnong. Ka KSU ka la ther tyngeh ruh ia ka bor shnong jong ka Nongtrai bad ka la kynnoh ba ki la pyrshang ban buhrieh ia ka jingteh hapdeng ka shnong bad ka Lafarge.
Ki la iathuh ba ki la dep pan jingtip lyngba ka RTI na ka Dorbar Shnong ba kan pynbna paidbah ia ka jingiateh kaba la la ia soi ha ka 12 tarik u naitung hynrei ki la kynnoh ba u Rangbah shnong u bah Bnes Lingdar Lyngdoh um shym la ai jubab haduh mynta ruh. “Ngi la shim ia ka rai ban pynlong Dorbar paidbah bad ngin shim ruh ia ka rai ha katei ka dorbar ia ki jingiakhih kiba shakhmat” ong u General Secretary ka KSU Nongtrai Unit u samla Truelywell Lyngdoh haba kren sha ki nongthohkhubor mynta ka sngi.
Katkum ka jingiathuh utei u nongialam ka KSU u la ong ba ka Lafarge kam shym la bud beit ia ki kyndon ia teh kata ban thungkam marwei na manla ki thliew ing ha katei ka shnong kaba don 200 ing tam. U la ong ba ha ka sien ia khih ba ki dang shu dep pynlong ha Polo u Director ka Lafarge u la kular ban ai ha ki ia ka rai mynta ka sngi bad ki la kyrmen skhem ba mynta ka sngi kin ioh ia ka rai na ka Lafarge hynrei u Director um treh pynban tang ban ia kynduh ia ki ruh.
Ki nongshong shnong ka Nongtrai ki la kyntait ia ka jingkam ka Lafarge ba ka la thep kam 547 ngut hapoh katei ka kompeni bad ki la kyntu ia ka sorkar ba ka dei ban leit jngoh ia katei ka kompeni ban pynshisha ia ki kot ki sla ki nongtrei. Ki la byrngem ruh ban ujor sha u Chief Information Commissioner pyrshah ia ka Dorbar Shnong naba kam ai jubab ia ka RTI. Kila ong ba haduh mynta kim pat tip kaei ka ijngiateh ba ka Dorbar Shnong ka la ia soi bad ka Lafarge.