Mynta, lait phatok u sordar Wahkhen

Shillong, 18 Jymmang:
Lashai ka sngi ka 10 tarik u jymmang, ka dei ka sngi jong ka jingdap 20 sngi kynthih ka jing shong phatok u sordar ka Wahkhen, u bah Skhem bor Khongjirem. U bah Khongjirem u la shah kem ha ka 30 tarik u iaiong ha ka por ba u dang leit shah hajir ha kashari hadien ba ka la khot hajir ia u namar ka jingai ai sertiphiket sha ki nongshong shnong kaba la ong ba u la pynkhein ia ka hukum ba ka high Court ka la pynmih ha ka 10 tarik u nohprah, 2014.
Lah ban kdew ba ha ka 10 tarik u nohprah, 2014 ka high court ka la pynmih ia ka hukum ba ki Rangbah shnong kim don bor bad kim don hok na ka ain bad na ka riti synshar ka ri ba kin ai sertiphiket sngi kha sngi iap lane ban rejistar ia kino kino ki kot ki sla kum ka jingai jingbit ban shna ing lane ban shim ram na bank. La set phatok ia u sordar Wahkhen namar ba u la pynkhein ia katei ka hukum ka high Court.
Ha kawei pat ka khubor la iathuh ba ki paidbah nongshong shnong ka Wahkhen lashai ka sngi kin wan sha nongbah Shillong ban pdiang burom ia u sordar ha ka sngi ba u mih na phatok ryngkat ki syntiew ban pynkup burom ia u.