Mynta la kwah VAB sa U Mukul, leit iakren ia U Rajnath

Shillong, 01 Naiwieng:
Hadien ka jing ia pyni bor jongu bad U Chief Executive Member jong ka Khasi District Council bad nangta hadien ka jing pynjari da ka Ordinance, kaba dei ka ain Rangbah Shnong jong ka sorkar bad hadien kata, sa ka jingpynkhreh ia ka ain thymmai ia ki Rangbah Shnong ka Meghalaya Grassroot Institutions Governance Act 2015, kaba la pynbitar tyngeh ia ki Rangbah Shnong ka Ri Khasi Jaintia, kat haduh ba kin dawa ba un hiar shuki noh, mynta ka sngi U Mukul Sangma, ula leit ia kynduh ia u myntri kam poh iing ka sorkar India, na ka bynta ban ioh jingmynjur noh ia ka Village Administration Bill (VAB) jong ka KHADC bad ka JHADC.
U Myntri Rangbah ka jylla u  Dr Mukul M Sangma mynta ka sngi, u la iakynduh ia u Myntri kam pohiing ka ri u Rajnath Singh ha  jaka sah jongu ha kaba u la batai ia ka jingdonkam jong ka  VAB ban ioh noh ia ka jingmynjur jong u Lat ka jylla.
U Myntri Rangbah u la batai hakhmat u myntri kam pohiing ia ka nongrim jong ka VAB hadien ba la shah sloit ka iktiar jong ki bor shnong ha ka Kashari High Court ha kaba ki rangbah shnong kim lah shuh ban ai syrnot sha ki nongshong. U la kyntu ia u Myntri kam pohiing ka ri, ba ka long kaba donkam kyrkieh ban ioh ia ka jingmynjur ia kane ka VAB.
U la iathuh ruh ha u myntri kam pohiing ba ki ain jong ki ar tylli ki district council ka  Khasi Hills Autonomous District (Village Administration) Bill, 2014 bad ka Jaintia Autonomous District Council (Establishment of Elaka and Village Election, Appointment, Powers, Functions and Jurisdiction of Dolloi/Sirdar and Waheh Shnong) Bill, 2015  la pynbeit bha ka sorkar ia ki kyndon jongka bad hadien ba la pynbeit la phah sha u Lat ka jylla.
U la ong ba u Lat u la phah sha ka tnad kam pohiing ban bishar bniah ia kine ki Bill bad ka jingpynslem ban ai ia ka jingmynjur ia ki Bill ka la wanrah ia ka jingsngew tieng na ki bor synshar shnong bad ka jingthmu artatien ia ka jingmut jong ka sorkar ha kaba ki la pynlong ia ka jingiakhih paidbah kaba jur.Ha kajuh ka por, u Myntri Rangbah u la iakren ruh ia ka shong suk shong sain ha kane ka jylla bad kyrpad ia ka sorkar pdeng ban ai jingkyrshan ba ka sorkar jylla kan pynkhlain ia ka tnad pulit ha ka jylla khamtam sha ki thain khappud.Na ka liang u Myntri kam pohiing ka ri u Rajnath Singh u la kular ba un shim khia ia kane ka kam.