Mynta ka taiew kut ka jingai por, halor ka kynnoh bamsap KHADC

Shillong,25’lyngkot:
Ka por ba la pynjlan ia ka kynhun tohkit Majistor ka KHADC halor ki jingkynnoh bamsap namar ka jingrung ka pisa jong ka District Council sha ka bank account ki riew shimet kan kut noh mynta ka taiew, iathuh ki tyllong khubor ba iajan bha hapoh District Council.
Lah ban kdew ba kham mynshuwa la ai por ar bnai ia ka kynhun tohkit ba la khlieh da u nongbishar ka District Council Court u bah S.Kharsyiemlieh ba kan pyndep ia ka jingtohkit hynrei la pan por biang bad la pynjlan haduh ka taiew ba khadduh jong u kyllalyngkot bad katei ka por kan kut noh sa saw ne san sngi mynta bad ki jingshisha halor katei ka jingjia kin sa paw hadien ba la mih ka ripod.
Lah ruh ban kdew ba ha ki khyndiat bnai ba la dep ka la mih ka jingkynnoh halor ka pisa jong ka Professional Tax kaba la lum na Nongstoiñ bad Nongpoh kaba la palat klur tyngka ha kaba katei ka pisa ka la rung sha ka account jong ki riew shimet bad sha ka account jong ka Khasi Heritage Conservation Forum ( KHCF) kaba peit ia ka tamasa mawbynna ha Mawphlang ( Monolith Festival).
Kiba bun na ki account jong kitei ki riew shimet ki tyllong khubor ki la iathuh ba kiba bun dei sha ka account jong u Secretary barim ka KHADC u bah W.Syiemlieh uba la shah pynkiew kyrdan kum u Principal Secretary katto katne por ha u snem ba la dep hynrei mynta la weng noh ia u.
Ki tyllong khubor ki la iathuh ba haduh mynta ka kynhun tohkit ka dang khot hajir ia utei u Secretary barim dang shisien bad kata ka de ha ka 12 tarik u kyllalyngkot bad la ong ba u Secretary barim u la aida ka jingthoh halor katei ka hajir.