Mynta ka sngi, yn leit on thang ia U bah Sumar Sing Sawian

Shillong: Ka jingleit on thang, ia U bah Sumar Sing Sawian, kan long mynta ka Sngi U Blei, ka 9tarik Iaiong 2023, ha kaba ia ka met jong utei u rangbah, yn rah na ka iing sah jongu ha Umroi, Labansaro, ha ka por 1.30 nohsngi bad yn leit on thang ha Jingthang briew, Jaiaw.

U Bah Sumar, ula khlad noh ha ka miet jong ka sngi thohdieng, ha ka iingsah jongu ha Umroi, Labansaro, ha ka rta kaba 81snem.

U Bah Sumar, uba dei uwei na ki nongthoh khubor, ba la ih bha, ha kane ka kam, ula don ha ka tnat pathai khubor, kaba paw bha jong ka India, ka Press Trust of India (PTI) bad ula long ruh u nongseng bad U Editor jong ka kotkhubor Apphira.

U Bah Sumar, u long ruh uwei na ki nongialam ba rangbah jong ka Seng Khasi Sengkmie, ha kaba u dei ma u, uba lam lynti ia ka jingleit kiew Lum Sohpetbneng, ba shisien shisnem, ba la tip, kum ka “Kiew Pyneh rngiew”.