Mynta ka rai ia ki 162 ngut, ki kyrtong elekshon GHADC

Shillong, 11 Risaw:
Ka jingpynkhreh na ka bynta ka elekshon jied MDC ha GHADC ka ban long lashai ka sngi la dep ban pynbit pynbiang baroh ia ki jingdonkam bad ha katei ka elekshon ki don baroh 162 ngut ki kyrtong bad 79 ngut na kitei ki dei ki kyrtong shimet. Ki nongthep vote baroh ki don 5,90,456 ngut bad ka Tura ka dei ka konstitwensi kaba tam ki nongthep vote bad ka don 42,774 ngut ki nongthep vote katba ka Rongrikimgre pat ka dei kaba khyndiat tam ka don 11,203 ngut ki nongthep vote. Ha katei ka elekshon ki 9 ngut ki kyrtong Congress, 26 ngut ki kyrtong a NPP, 14 ngut ka UDP , 6 ngut ka BJP katba ka NCP bad ka Garo National Council ka don mar 4 ngut ki kyrtong.

Ha katei ka elekshon ki don ruh ki kyrtong ki bym dei ki Garo bad ki bym dei ki riewlum kitei ki dei u Jyotirmoy Koch kyrtong shimet, u Mahiran Hajong na ka BJP bad u Nripendra Koch ka Congress ki ban ia khun na Betasing constituency. U Bhupendra Hajong ka BJP bad u Jogadish Chandra Hajong ka Congress kin ia khun na Zikzak constituency. U Prasen Rabha, kyrtong shimet , u Ranjit Rabha ka BJP, Sanjay Kumar Rabha, kyrtong shimet , Chiranjit Rabha kyrtong shimet kin ia khun na Naguapara constituency. U Milon Chandra Hajong u ia khun kum u kyrtong shimet na Balachanda constituency.
Ki kyrtong ki bym dei riewlum ki kynthup ruh ia u Monirul Islam ka Congress, Shaza Zaman, kyrtong shimet , Sofior Rahman, kyrtong shimet kiba ia khun na Balachanda constituency. U Enamul Islam u kyrtong shimet bad u Sader Hossain ka Congress , SG Esmatur Mominul ka NPP bad Shahanur Islam kyrtong shimet kin ia khun na Shyamnagar constituency.