Shillong: Ka Shillong Lajong FC kan iakhun mynta ka sngi pyrshah ia ka Real Kashmir FC ha ka lumping Hero I-League 2018/19 ha madan TRC Turf ha Srinagar por 2 PM. Ia kane ka jingialehkai yn pyni paidbah ha Star Sports bad ruh ha Hotstar bad Jio TV.
Kane ka dei ka jingialehkai kaba hynriew ia ka Kashmir hadien ba ka la pynliuem ia ka Indian Arrows bad ka Aizawl FC. Haduh mynta ka Real Kashmir ka la kamai 10 point na ki 6 sien ialehkai bad ka don ha ka lyrdan ba 5 jong ka miej kamai point .
U coach ka Kashmir u Dave Robertson u la ong ba ki nongialehkai ka Lajong ki la ialehkai bha ban the pia ka kol kumba la iohi ha ki jingialehkai ba la dep. Ki la ialehaki bha, ki la thep kol hynrei ki la sham rem ruh.
Na ka liang ka Lajong ha kawei ka liang, ka la iaid lyngba ka jingeh ha kane ka lumpung hadien ba ka la shah rem linter ha ki jingialehkai khamtam kiba shabar. Ka Lajong ka kamai 4 point na ki 7 tylli ki jingialehkai bad ka jop tang ia ka Aizawl bad iakhaid ia ka Minerva Punjab ha ka jingialehkai ha la iing.
U Coach ka Lajong u bah Alison Kharsyntiew u la ong ba ka Lajong ka donkam ban ioh beit ia ka jingjop ha kane ka jingialehkai. “Ka thong jong ngi ka long ban pynphai kylla ia kaei kaba la shah rem ha ki jingialehkai ba la dep. Ngi kyrmen ba ngin sdang ia ka jingialehkai kaba thymmai naduh lashai pyrshah ia ka Real Kashmir”, u la ong.