Mynta ka jingialang JACATAM, yn nang jur ki jingiakhih

Shillong, 12 Nailur:
Ki khynnah skul da ki lak ha kane ka jylla ki la shah ktah na ka jingsangeh shim klas ki nonghikai hynrei ka sorkar ka dang thiah lyngngai haduh kine ki sngi. Ka jingiakhih da kaba sangeh leit trei jong ki nonghikai kan kut lashai hadien lai sngi. Lashai ka sngi Thohdieng, ka JACATAM kan pynlong ia ka jingialang ha Shillong ban shim shuh shuh ia ki lad jingiakhih namar ba ka sorkar kam shym la patiaw ei ei haduh kine ki sngi.
Haba iakren hynne bad u Chairman ka JACATAM u bah ED Nongsiang, u la ong ba haduh mynta ka sorkar kam shym la phah kyrwoh ei ei ba ka kwah ban iakren bad ka dang sngap mynthi. “Namar kane ka jingbym sngap ka sorkar, ka jingiakhih kan iaid beit kumba la pynbna bad lashai kan don ka jingialang jong ki nonghikai hapoh ka lama ka JACATAM ban shim shuh shuh ia ki lad jingiakhih, la ong u Bah Nongsiang.
Ka jingiakhih jong ki nonghikai ka la ktah jur ia ki khynnah skul namar ba ym don nonghikai ban shim klas. Ka jingiakhih jong ki nonghikai ka la poi sha ka 7 sngi naduh ka 27, 29 tarik Nailar, bad ha ka 3, 4 bad 5 tarik Nailur bad sa mynta ka 11 tarik ban long haduh ka 13 tarik Nailur.
Ka JACATAM ka dei ka shatri jong ki nonghikai skul bapher bapher ha kane ka jylla naduh ki lower prmary haduh ki kolej.
Da ki phew hajar ki nonghikai ha kine ki sngi, ki la pynlong ia ka jingiakhih ha baroh kawei ka jylla ban dawa na ka sorkar ba kan khot iakren hynrei sngewsih haduh kine ki sngi, ka khlem pat khot.
Kaba ktah eh ka long ba ki khynnah skul da ki lah ha kane ka jylla, ki shah ktah na kane ka jingiakhih hynrei ka sorkar kam patiaw ei ei bad ikumba ka sngew tynnad pynban.