Mynta ka elekshon MP ha Garo Hills

Shillong 15, Jymmang:
Ka jingjied ia u MP ba thymmai na Tura ban mihkhmat sha Lok Sabha kan long lashai ka sngi ka 16 tarik Jymmang bad ka jingmih kan long ha ka 19 tarik.
Ki paidbah nongthep vote ka Garo Hills kin jied ia u kyrtong  ka NPP u Conrad K Sangma ne ia ka kyrtong ka Congress ka Dikkanchi Shira.
Na ka liang ki bor pyniaid ia ka elekshon, ki la pynbiang ia ki bor pahara baroh ha ki jaka ba donkam khamtam ha ki jaka ba don jingma ba lah ban mih ka huri hura.
Ka Tura Parliamentary constituency ka don 6,221, 89 ngut ki nong thep vote kin jied ia u nongmihkhmat sha Parliament.
Ka elekshon shiteng samoi na Tura la hap ban pynlong hadien ba la khlad kyndit noh u MP u Purno A Sangma na ka NPP ha u bnai ba la dep.
Ka sngi niew vote kan long ha ka 19 tarik Jymmang kaba dei artad ka sngi niew vote ia ka jingthep vote MLA elekshon ha Assam.
Na ka bynta ka Tura Parliamentary constituency kaba kynthup san tylli ki district ka don 315255 ngut ki nongthep shynrang bad 306934 ki shynrang ban jied ia u MP thymmai hadien lai snem ba la ioh ia ujuh u MP u PA Sangma.
Ki don 945 tylli ki jaka thep vote ha baroh kawei ka Garo Hills.
Ia ka jingthep vote yn pdiang beit da ka dur EPIC hynrei yn ailad ruh ia ki nongthep vote kiba don kyrteng ha ka electoral roll ban pyni da kiwei ki sakhi lada kim don ka EPIC.
Ki don 410 tylli ki jaka thep ba don jingma bha bad 288 ki jaka ba don jinggma malu mala.
Ki don ruh sa 126 tylli ki jaka thep kiba lah ban mih jingiakynad hapdeng ki nongkyrshan jong ki kyrtong bad 409 tylli ki jaka thep vote kiban long jai jai.
Ka Congress ka don 22 ngut ki MLA na ri lum Garo kiba  la trei bor bah ban pynjop ïa ka kyrtong jongka Congress. Katba ka NPP ka don tang arngut ki MLA bad 15 ngut ki MDC kata kynthup ïa ki MDC jongka BJP bad GNC. Kumta baroh ki MLA Constituency ha ri lum Garo ki don 24 tylli ki ban ïashim bynta ha kane ka elekshon ba mynta ka kynti.