Mynta jingialang nongrep ha Nongstoin

Shillong, 6 Naiwieng:
Ki seng nongrep bapher bapher hapoh ka lama jong ka Joint Action committee of All Meghalaya Farmer Union (JACAMFU) kan pynlong ia ka jingialang paidbah lashai ka sngi ha Iew Nongstoin ha ka por 11.30 baje mynstep.
Ki seng nongrep ki kynthup ia ka Hills Farmers Union, Riwar Sepngi Farmer’s Union, Seng Nongrep Synroplang Ri- bhoi District, Warsan Lyngdoh Farmer Association West Khasi Hills, Eastern Ri-Bhoi Farmer Association, ka Nongklung Area Farmer Association bad kiwei kiwei.
Katkum ka kyrwoh khubor na u bah Commander Shangpliang uba dei u Chairman jong ka JACAMFU u la iathuh ba kane ka jingialang paidbah ka long kum shi bynta ban pynshai sha ki paidbah halor ka jingbymshimkhia jong ka sorkar na ka bynta ki nongrep.
U la iathuh ba ka seng nalor ka jingdawa ban wanrah noh da ka ain halor ka rep ka riang, ka la buh ruh ia kiba bun ki mat jingdawa na ka bynta ban kyntiew ia ka rep ka riang, hyrnei ka sorkar hapoh ka jingialam jong u Dr.Mukul Sangma kam shym la patiaw ia ka jingeh jong ki nongrep.
U bah Commander Shangpliang u la kyntu ia ki paidbah ban wan ai jingkyrshan ba pura khnang ba ka sorkar kan pyntreikam noh ia ki jingdawa jong ka seng namar haduh mynta ym pat don ki kynhun ki ban iakren ia ki jingeh jong ki nongrep wat la bun ki nongshnong shnong ha ka jylla dei ki nongrep u la bynrap.