Mynta jingialang bah ha Madan Malki “sma tur Secreteriat”

rPynjari section 144CrPC ki bor District
Shillong, 5 Nailar:
Ka jingialang paid bah ka ban pynlong da ka kynhun u bah Ardent M Basaiawmoit lashai ka sngi ha madan Malki, ka la sma tur Secretariat lypa, namar ba ki lad khu bor ki la iathuh ba haduh ba thoh ia kane ka khubor, ka sorkar kam pat shym la jubab eiei halor ka jingdawa kaba la rai na ka jingialang kaba dang shu dep pynlong shen ha madan Malki, kata ban weng noh ia ka jingpyn bna ka sorkar lyngba ka tnad MUDA ha kaba iadei bad ka ain shna ing.
Mynhynnin ka sngi u bah Ardent u la pynbna ba ka jingialang kan iaid beit, lada ioh ne ym ioh jubab na ka sorkar, kaba u la ong ba lada ioh ruh yn pyntip ia u paidbah ha katei ka jingialangbah bad lada ym ioh jubab ruh yn iaid shakhmat ia kaba donkam, kaba mynshuwa u la pynbna paidbah ha madan Malki ban leit tur sha Secretariat, namar ba ki la pynkynriah noh ha katei ka sien kaba nyngkong kaba la long ha ka 27 tarik, namar ka la ia tyngkhuh ryngkhat bad ka jingiap u President barim ka ri u Dr.APJ Abdul Kalam hangne ha nongbah Shillong. Katkum ka jingkren u bah Ardent ha katei ka jingialang kaba la dep la sngewthuh ba lashai ka sngi kan dei ka jingleit tur sha Secretariat namarba la ia thuh ba haduh mynta ka sorkar kam pat ong eiei halor ka jingdawa jong ki.
La sngewthuh ruh ba u paidbah un tuid da ki hajar ngut sha ka jingialang ka ban long ha madan Malki, ha kaba ki lad khubor ki ong ba tang na Mawlai ruh kin tam hajar ki paidbah ki ban leit jingialang kynthei bad shynrang. Haba ia kren bad u President ka KSU Mawlai Circle u samla Biangbor Paliar u la ong ba nalor ki sengbhalang, ki seng samla kin don bun ki riew paidbah ki ban leit sha katei ka jingialang khamtam naba ki seng bhalang ha Mawlai ki la ioh ban pynlong ar tylli ki jingialang paidbah ha ki ar miet. Haba la kylli kumba katno ngut ki paidbah kiba la wan sha ka jingialang paidbah ha ki ar miet u President ka KSU u la ong ba ki la kot da ki hajar ngut bad kitei kiba la wan jingialang paidbah ha kitei ki ar miet ki long kiba la khreh ban leit sha ka jingialang ka ban long lashai ha Madan Malki.
Lah ban kdew ba la pynlong ia katei ka jingialang ban pyrshah ia ka jingkyntur pud ka MUDa hapoh u pud u sam ba dang hap hapoh ka jingpeti ka KHADC ha kaba ki paidbah ki ia kynduh jingeh ban shna ing, lane ban tan bording ne ring um ha ing jong ki lymda kim pyni ia ki jingbit ba ki la ioh na ka tnad MUDA. Hynrei shi sngi shuwa katei ka jingialang paidbah ka ban long ha Malki u District Magistrate ka East Khasi Hills District u la pynjari da ka section 144CrPC kaba la khang pyrshah ia lum lymbung palat ia ka san ngut 500 mitar tawiar ka Secretariat. Katei ka jingialang, la sngewthuh ba kan sdang ha ka por 11baje nohsngi ha Madan Malki.