Mynta ialang ILP, ki seng sain pyrthei bad ka KHNAM

Shillong,23 Nailur:
Ka KHNAM ka la khot ia ka jingialang lashai ka sngi ka 24 tarik ha Shillong Club ia baroh ki seng sain pyrthei kiba kyr shan bad dawa ban pyn treikam ia ka ILP. Kumba la maitphang da u Working President ka KHNAM ka dei ka jingialang kaba yn long mynta ka sngi ka KHNAM ka dei tang ka nongkhot ia ki seng sain pyrthei ba kin ioh ban ia phylliew jingmut lang kumno banpynbor ia ka sorkar jong u Dr.Mukul Sangma kaba la shu sngap mynthi man man ia ka jingdawa ILP ki sengbhalang.
Lah ban pynkynmaw ba u Bah Adelbert u la pynpaw ba ka KHNAM ka kwah ba baroh ki seng sainpyrthei kin ia tylli lang kawei kumba ki sengbhalang ki la ia tylli ban pynbor ia ka sorkar ban pyntreikam noh ia ka ILP.
La ioh jingtip ba kham bun na ki sng sain pyrthei kiba la pynpaw ia ka jingkwah jong ki ban pyntreikam ILP kin ia wan sha katei ka jingialang ba la khot da ka KHNAM. Shuh shuh katkum ki jingioh lum jingtip la thikna ba ka UDP ka dei ka wei na ki Seng sain pyrthei ka ban leit tban ia shim bynta ha katei ka jingialang ka KHNAM.
Lah ban kdew ba jan baroh ki seng sain pyrthei ha ka jylla ki dei kiba la pynpaw ba ki kwah ILP ha kaba la iohi ia kane ha ka jingialang ba u Myntri Rangbah a jylla u la khot ia baroh ki seng sain pyrthei. Lah ruh ban kdew ba kumba la paw ha katei ka jingialang ba la khot da u Myntri Rangbah ka KHNAM, UDP,HSPDP, GNC,NPP ki dei ki seng kiba la pynpaw ia ka jingkwah ILP jong ki katba ka NCP ka don ha ka liang ka sorkar bad kumjuh ruh ka MDP ka dei ka seng kaba sah hapdeng, lait noh ka Congress kaba ialam ia ka sorkar khleh khawlang.