Mynta iakhun MP u CM Jha ha Bihar, na along ki pulit Shillong

Shillong, 29 Iaiong:
U CM Jha uba dei u trai bad kumjuh ruh u Vice Chancellor jong ka CMJ University, Shillong uba la shah kem ha ki pulit jong Meghalaya lashai ka sngi 30 tarik Iaiong un iakhun ia ka elekshon MP na Jhanjharpur Parliamentary Constituency, Bihar.
Ki pulit ka jylla ki la kem ia u Jha halor ka jingkynnoh ba u la leh thok bad die tuh ia ki certificate sha ki samla pule ha kaba u Lat barim jong ka jylla u RS Mooshahary u la ai jingmut ia ka sorkar ban khang noh ia ka University jongu.
Ki pulit ki la kem ia u Jha katba u dang ialap ilekshon kum u kyrtong shimet namar un iakhun Jhanjharpur Parliamentary Constituency kum u kyrtong

shimet bad mynta u don ha ka jingshah tohkit jong ki pulit bad u dang shah set ha along jong ka sardar police station.
Na ki khubor ba la iohlum la ong u Jha u la dep file ia ka nomination jongu na katei ka constituency kum u kyrtong shimet bad ka jingthep vote kan long lashai ka sngi 30 tarik Iaiong.
Haba la ioh ba iakren bad ki pulit syntiat jong ka jylla bad haba la kylli kumno kin leh lada u Jha un jop ilekshon bad un long kum MP, ki la iathuh ba lada u jop ruh un dang dei u nongkam sniew bad uba la shah kem halor ki kam thok kam shukor.
Ki la ong ruh ba, lada u jop ruh u Jha un nym pat long kum u MP namar un sa kylla long u dkhot ba pura jong ka Parliament tad haduh ba un da shah pynsmai.
Nalor kane une u pulit bym kwah ban pynpaw kyrteng haba kren ha u nongaikhubor u la ong, lada u la dei u MP ruh na ka liang jong ki pulit kin leit pan jingbit na u speaker na ka bynta ban kem bad set phatok ia u.
La iathuh ruh ba, na ka liang jong ki pulit ka jylla hadien ba la dep ban tohkit 10 sngi kynthih kin pynkhreh ruh ia ki kyndon mutkotduma kiba yn pynngat pyrshah ia u CM Jha khnang ba hadien ba la dep ka jingtohkit da ki pulit ka iingbishar kan rai ban set phatok ia u.