Mynta ia kynduh Lat ka HSPDP, na ka kam Parliamentary Secretary

Shillong, 6 Iaiong: Lashai ka sngi ka HSPDP kan leit ban ia kynduh ia u Lat ka jylla ban ia kren halor ka kam kaba ia dei bad ki Parliamentary Secretary ka sorkar jylla , ia katei ka rai la shim ha ka jingialang CEC jong katei ka seng kaba la long mynta ka janmiet. Haba ia kren bad u Rupang u President Rangbah ka HSPDP u bah Ardent M Basaiawmoit, MLA ka Nongkrem u la ong ba haduh ba ia kren bad une u nongthohkhubor ym pat lah ban pynthikna ia ka por jingiakynduh namar ba ki dang ap ia ka por kaba biang kaba u Lat u lait ban ia kynduh ia ki bad u la ong ba katei ka seng ka la pynkhreh ruh da ka jingthoh ban ai sha u Lat ha katei ka jingiakynduh.
U General Secretary katei ka seng pat u bah Witting Mawsor u MLA ka Mawshynrut u la ong ba ka HSPDP ka la rai ban ia kynduh ia u Lat bad ban ai da ka jingthoh ryngkat ki jingbatai bniah ia u shaphang ka kam Parliamentary Secretary ha kane ka jylla. U bah Witting u la ong ba la don ka jingthmu ban ia kynduh ia u Lat ha ka por 2 baje nohphai sngi hynrei haduh mynta ym pat lah ban pynthikna la u Lat u lait ne em ha kata ka por.
Katkum ka jingiakren bad u Rupang u bah Witting u la ong ba ka kam Parliamentary Secretary ha kane ka jylla ka la long pyrshah ia ka Article 164 Clause I bad hangne u la ong ba mynshuwa ka long laitlan ia ka sorkar ba kan bhah kam myntri sorkar katba ka mon ia ki MLA hynrei hadien mih ka aiñ kaba la khang pyrshah bad dei ban don tang 12 ngut ki MLA. Hynrei u la ong ba ka kam Parliamentary Secretary ruh ka dei ka bynta kaba ka aiñ mynta ka la pyniahap bad ka kyrdan myntri sorkar bad hangne ha jylla jong ngi u la ong ba ki don haduh 18 ngut ki Parliamentary Secretary bad katei ka jingdon jong ki kaba haduh 18 ngut kan ktah ruh ia ka pla tyngka jong ka sorkar jylla.
Halor kane ka juh ka bynta u la ong ba ha Delhi mynta ka sorkar u Arvind Kejriwal ka don haduh 16 ngut ki Parliamentary Secretary bad ia kine baroh 16 ngut yn tian bishar ha ka 11 tarik mynta u bnai,ia katei ka rai u la ong ba ka HSPDP ka la shim hadien ba ka la buddien bha ba ha baroh ki jylla katei ka Article 164 Clause I ka la treikam lut bad tang ha kane ka jylla kam pat treikam bad dei halor katei ka nongrim u la ong ba ka HSPDP kan leit ban batai bin pabin jai pajai ha u Lat ka jylla ba un tuklar ia katei ka kam.