Mynta, hiar Umiam ka FFT

Shillong, 15 Nailur:
Ka Fact Finding Team (FFT) lashai ka sngi Hatmajai kan hiar ban leit jurip ia ka pung Umiam ban wad jingtip halor ka jinglong jingman ia ka rukom pynmih bor ding na katei ka Umiam Hydroelectric Project.
U Chairman ka FFT u Bah Jemino Maw thoh u la ong ba ka jingleit jurip ia ka Umiam project kan long kaba donkam bha namar dei kane ka projek kaba bsa bording bun eh ha kane ka jylla.
“Ngin sa tip ia ka jingduna bad ka jingtreikam jong katei ka projek bad ngin sa ai jingmut ruh kukmno ban pynbha shuh shuh hadien ba la ioh ia ka jingtip”,la ong u Bah Mawthoh.
Ha kajuh ka por, u la ong ba kin pynlong ia ka jingiakren bad ki heh ka MeECL shwa ban pynlong ia ka jinglum jinglang ia ki jingtip ba ki la ioh shwa ban aiti pat sha ka sorkar.
“Ngi kyrmen ba ngin lah ban thaw ia ka kaiphod ia ka jingjurip jong ngi kiba lah ban pynbha shuh shuh ia ka jingtrei kane ka tnad pynmih bording ha ka jylla”, la ong u chairman ka FFT.
Shwa ia kane, ka FFT ka la dep pynlong ia ka jingjurip ia ka Umtrew Hydro Electricity Project (NUHEP), Ri-bhoi district.
“Ngi la sngew hun ia ka jingiaid ki kam ki jam ha ka jingpyntreikam ia ka Umtrew Projek lyngba ka jingtrei bad kitkhia ki enjiniar ka MeECL”, u la ong.
Ka FFT ka la dep jurip ruh ia ka Myntdu-Leshka Hydro Electric Project (MLHEP).