Mynshwa ngi iakhun elekshon, da ka jingieid, mynta hap pynkham pisa, hap khawai, ong U CEM barim

Shillong:U Chairman bad Chief Executive Member (CEM) barim ka Khasi Hills Autonomous District Council (KHADC) u bah Rang kynsai R Makdoh, haba iakren halor ki jingkylla ha ka jing long jingman jong ka sain pyrthei, ha ka jylla, u la ong ha ki por mynshwa ka jing iakhun ia ka election ka long da ka jingieid ka jingshaniah, hyn rei mynta ka la long da ka bor jong ka pisa.

Haba ia thuh ia ka rukom ia lap election mynshwa u bah Makdoh u la ong ka jingiakhun election ha ki por mynshwa ka long ka ba khuid, bad u kyrtong u dei uba don ia ka jingmut shi sha ban ai ka jing shakri ia ka ri bad ka jait bynriew, hynrei mynta ki kyrtong hi ki dei tang kiba heh spah.

“Ki kyrtong ha ka por mynshuwa, ki hap ban pyrkhat la kin ia leh ne em ban iakhun ia ka election, namar ba ka dei ka kam ba kyntang ka kam shakri ia u paidbah 5 snem bad haba ki la ialam beit kan iaid beit bad haba ki ki ialam bakla kan poi sha khlaw”u la bynrap.

“Ha ki por ba la dep ka jingialap election, ki kyrtong ki ju ialap ia ki mat ban pynim bad pynbha ia ka jaitbynriew, ki ju pynlong ia ki jingialang ban ialap election tang ha ki iew bad ki paidbah ki ju shim rai ban ai ka jingkyrshan ne em ia u bad ym ju donkam pisa, ym donkam bai sha, kumba ka long mynta”la ong u bah Makdoh.
“Hynrei mynta la 25 -30 snem, kat kum ka jingiohi jong nga ka la pher bha ha ka rukom pynlut ia ka bai election ruh ka la pher ban ia kaba mynta ym ju don mat shuh ban ia kren, u kyrtong um don shuh u ba shemphang bad u kyrtong u ba shem phang hi u sah shadien namar ba ym nud shuh ban leh election na ka daw ba ki tieng ia ka jinglut”u la bynrap.

“La 25 -30 snem kiba ia khun hi ia ka election ki dei tang ki heh spah, tang lada don pisa la kwah ban ia khun election, katba ki riew stad ,ki riew shemphang ha ka kam sainhima ki ba mut ban shakri hok ruh kim nud, namar ba kim don ia ka pisa shibun”u la bynrap.
U MDC barim ka Nongpoh Constituency u la ong ruh “Ngi donkam ia ka pisa, hynrei ka ba ima mynta ka long ka jingrung ing jong ki kyrtong, namar ba wei la rung la hap ban pynjaw ia ki, wat la kim pan, hynrei ban pynkmen ia ki,ki kyrtong kim hap hi ban pynkham pisa”.

“Ka wei kaba ima na kine, ka long ka jingkhawai lynter jong ki kyrtong, pynbam pyndih ia ki briew bad ki briew ruh bunsien ki klet noh ia ka mat jong ki jait bynriew bad ki kmen ia kane ka jingpynbam pyndih da ki kyrtong”u la bynrap .
“Ki kmen ia ka ioh shatri, ki kmen ia ka ioh bai bam baidih ka ioh bai kot baisla bad haba ka kane ka rong phong ka wan bad ka tap noh ka lah ban pynmatlah noh ia ka jingshisha” la ong u bah Makdoh.
“Ngam dei u riew shem phang lane u riew stad hynrei ha ba baroh ki la ngop ha ka pisa, kin ym ioh shuh ia ki nongialam ki ba shemphang. Nga ju kynmaw ia ki nongialam ba la rim kiba shem phang, kiba dei shisha ki nongialam kiba shemphang, hynrei mynta la shitom ban ioh ia ki jait briew kum ki nongialam mynshwa”u la bynrap.

U CEM barim u la kdew ruh “Ka bor jong ka pisa ka trei ym tang u nongai, hynrei ia u nongshim ruh kin don ki briew ba shim ia ka pisa, ka vote kim ai bad ki don pat kiba ong ba shisien la shim ia ka pisa ka vote ki la dei beit ban ai ka Vote la kin long ne em ki nongialam ba shem phang kim tip”.
“ki kyrtong hi kiba iakhun election da ka spah ki dei ki ban iakhun na ka bynta ka spah, namar haba la iakhun kin khmih lynti ruh ba kan wan phai biang, hynrei haba phi iakhun da ka jingieid lada jop ne rem ruh kan ym leilei”u la ong.

Na ka liang jong u, bah Makdoh u la pynpaw ba na ka liang jong u un dang bishar shwa la un wan hiar biang ne em sha ka lympung ban ia khun election bad lada u ioh ia ka party kaba biang ki mat trei kam, u kloi ban iareng ia ka election 2023 bad u la kyntu ia ki nongshong shnong ka Ribhoi District ba kin da bishar bha ban jied ia u briew u ba shem phang bad u ba lah ban ia ka jingshakri ba pura sha ki paidbah.