“Mynshwa ki pulit ki kynnoh ia ka KSU ka donkti bad ka HNLC”

Shillong, 09 Naiwieng:
Ka jingsted u Inspector General of Police (IGP) u GHP Raju ban kynnoh ba dei ki dkhot ka Hynniewtrep Youths’ Council (HYC)  ba donkti ban thaw jingkulmar ha ka jingiaid paidbah ka Synjuk Ki Nongsynshar Shnong ka Bri u Hynniew (SNSBH) ha ka 5 tarik Naiwieng, ka la pynlong ia ka HYC ban pynrem jur halor kane.
“Mynshwa ruh ki pulit ki kynnoh ba ka KSU ka donkti bad ka seng HNLC bad mynta ka thmu ban tei pop ia ka HYC namar ba ki tieng ba ki iohi ka la nang khlain bad ki kwah ban pyntroin noh ia ka seng”, la ong u president ka HYC u Bah Peter J Lawai uba long ruh u nongialam barim ka KSU haba kren mynta ka sngi sha ki lad pathai khubor.
“Ngi kwah ban pynshai paidbah ba ka HYC kam dei ka seng ba kwah ban thaw jingkulmar ne ban pynmih ia ka huri hura”, u la bynrap.U Bah Peter u la ther ia u IGP uba la pynmih ia ki kyntien buaid ia ki nongwan ban kyrshan ha katei ka 5 tarik. “Ka jingpynmih ia ka kyntien buaid da u heh pulit ka pyni ba ki Rangbah Shnong bad ki longkmie ruh ki dei ki nongbuaid kiba wan ha katei ka sngi ka jingiaid paidbah”,la ong u Bah Peter.“U IGP u dei ban panmap ia ka jingkren lamwir ia ki dkhot ka seng khlem da lap ia ka jingshisha”, u la ong u President ka HYC.U la ong ba ka HYC kam pyrshah ban kem iano iano lada lap ia ka jingshisha ia ki briew kiba donkti ban thaw jingkulmar wat ia ki dkhot ka seng ruh hynrei ka jingkloi u IGP ban kdew kti ia ka seng ka dei ka jingthmu ba don eiei sha lyndet.
Ha kajuh ka por, u Oganising secretary la HYC u Bah Nickson Dohling u la ong ba haba don kano kano ka jingkulmar ha ka jingialang, ka sorkar bunsien ka pynngat ia ka jingkynnoh ia kiba khot pynlong ia ka jingialang hynrei mynta ki kdew kti pynban ia ka HYC. “Ka HYC kam phah ia ki dkhot ban leit sha ka jingialang ha ka kyrteng ka seng, ma nga ruh nga leit sha ka jingialang kum u dkhot nongshong shnong ka Jaiaw Pdeng, ym kum u dkhot ka HYC, te hynrei ki pulit ki kdew kti ia ki dkhot ka HYC”, la ong u Nickson bad bynrap ba ka seng kam shym la bthah ia ki dkhot ban leit sha ka jingialang ki Rangbah Shnong hynrei mano mano ki leit da ka mon lajong.