Mynshwa ha ka por ka sorkar Congress, haba pynbeit pud, tang ban peit bha ruh ym nud ia U MR ka Assam, kut ka iadih sha, ong u bah Prestone

Shillong: Da kaba pyrto ia ka jingshlur bad ka jingkikthlieh ka sorkar NPP kaba ialam da u myntri rangbah u Conrad K Sangma ban tara wat ia ka mat pynbeit pud, u bah Prestone Tynsong u la ong ba mynshwa ha ka por ba u long myntri sorkar ha ka Congress, haba ki leit iakren pynbeit pud bad u myntri rangbah ka Assam, ki hap ban shu khaprip ngain ngain tang ban peit bha ruh ym nud ia u myntri rangbah ka Assam bad ka kut tang ha ka jingiadih sha.

Haba kren ha ka jingialang rakhe sngi kha ka NPP mynta ka sngi, u bah Prestone u la ong ba man ba ki iakren pynbeit pud, ka jingialang ka la shu kut haba iadih sha bad ynda la dep dihsa kila shu pynbna ba la rai rangbah ban shu pynneh kumba ka long ne status quo.
Katkum ka jingong u bah Prestone, kat ka rai rangbah ban shu pynneh status quo, ka bym poi sha bneng ne sha khyndew, ka long kaba thamula.

“Mano ba nud ban shim ia ka mat ka bym ju nud mynno mynno ia ka kam khappud, naduh ba 2003 tang shu ong ban iakren ia kane ka kam pud, leit sha Assam, ngi khaprip ngain ngain tang ban peit bha ruh ym nud ia u Myntri Rangbah ka Assam, ynda la dep iadih sha, ki ar ngut ki Myntri Rangbah, ki ong ba la iashim ia ka rai rangbah kaba shu pynneh kumba ka long, ne status quo hynrei kat kata ka rai rangbah, sha khyndew ne sha bneng ruh ym poi, hato ka dei ka rai rangbah. Ong ki briew ba u Conrad, u prestone kila die da ki haja kilometre ia ki jaka sha Assam, hynrei u blei un tip”, la ong u bah Prestone.

Hynrei ha ka sorkar kaba ialam u Conrad ba ka la shim ia kane ka mat bad la pyndep 6 tylli na ki 12 tylli ki jaka kiba iaknieh.
Hynrei ki briew kila kynnoh ba u Conrad bad u Prestone kila die ia ki jaka da ki hajar kilometre sha ka Assam, tangba kampher, namar ba uba najrong u iohi.