Mynsaw u pulit ba shah siat ha ka GNLA

Shillong, 24 Rymphang: U wei u pulit Havildar uba la tip kyrteng kum u Sengbath Marak u la shah siat ha ki lehnoh GNLA na ki bynta ki kti jong u bad u la mynsaw jur. Katei ka jingjia ka la jia ha ka por 2:30 baje nohphai sngi ha ka shnong Kamagre.
Katei ka jingjia ka la jia katba u Incharge jong ka Jengjal PS bad ka kynhun jong u ki dang wan phai na Gabil ki la iohi ia uwei u ehrang GNLA uba kim ithuh uba la kieng atiar bha bad u iaid ha surok bah bad u phong da ki jain thohrew (jain shipai) bad utei u ehrang u dang thmu ban rahbor ia ki ar ngut ki nongkhaii na katei ka shnong bad ki la thep ia ki hapoh kali. Hynrei haba ki pulit ki la tur sha ka phang ba ki don ki GNLA uwei na ki dkhot katei ka seng u la ther kuli sha ki pulit bad ka la dei na ki bynta ka kti utei u pulit Havildar.Ia utei u pulit ba la mynsaw la pynkit sha Hospital, la ong ba ha katei ka por ka la mih ka jingiather kuli markylliang hapdeng ki pulit bad ki lehnoh hynrei ki lehnoh ki la phet krad noh sha ki khlaw kiba rben. Ka kynhun ki SWAT na Tura bad u Commandant jong ka 2nd Batallion ryngkat u ASP ka Baghmara ki la leit sha katei ka jaka ban khynra lehnoh kaba ki nongshong shnong ki la iathuh ki don hynriew ngut ki dkhot ka GNLA.