Mynsaw u nongniah thuk thuk, ba leit tynrah nadien ka trok ha Saiden

Nongpoh, 31 Risaw: U nongniah ia kawei ka thuk thuk kaba don ia u number ML-05-AD-2047 bad uba la tip kum u Keane John Lyngdoh, u la mynsaw jur bad kata ka dei hadien ba katei ka thuk thuk ba u niah, ka la leit ban tynrah nadien jong kawei ka trok Tanky kaba don ia u number TR-O1-AG-1527 bad kaba la niah da u Topan Karmakar.

Katei ka jingjia, ka la jia mynta ka janmiet ha ka por 5:30 baje eiei janmiet ha surokbah NH-6 bad kaba hap ha shnong Saiden, ha kaba katei ka trok Tanky bad ka thuk thuk, ki dei kiba don ha ka lynti ban kiew sha Shillong, hynrei haba la poi ha katei ka jaka, katei ka thuk thuk ka la leit tynrah nadien jong katei ka trok.

U nongniah jong katei ka thuk thuk, uba la mynsaw ha katei ka jingjia aksiden, la pynkit noh mar mar sha Nongpoh Civil Hospital, na bynta ban ïoh ia ka jingsumar.