Nongpoh: Lai ngut ki briew kiba shong ha kawei ka Maruti Local Taxi kaba don ia u number ML-05-L-1483, ki la mynsaw bad kata ka dei hadien ba ki la iatyngkhuh bad kawei ka Tata Sumo kamai kaba don ia u number ML-06-A-8396, kaba la jia ha surok Shillong By-Pass bad kaba hap hapoh u pud u sam ka shnong Umroi Nongrah, Ri Bhoi.
Katei ka jingjia, ka la jia mynta ka janmiet ha ka por 4:30 baje eiei janmiet, ha kaba katei ka Local Taxi ka don ha ka lynti na Bhoirymbong sha Umiam, katba kata ka Sumo ka don ha ka lynti sha Bhoirymbong, hynrei haba ki la poi ha katei ka jaka, ki la mad ia katei ka jingjia aksiden.
Na kaba la iathuh da ki briew kiba shong hapoh katei ka Sumo, la ong ba u nongniah jong katei ka Sumo u la pyrshang ban kiar kat lah kat iai ia katei ka Local Taxi, hynrei ka rukom long jong u nongniah ia katei ka Local Taxi, ka long ba um lah bha shuh ban niah bha ia ka kali kaba u niah namar ka jingshoh u khawiang bad kaba la wanrah ia katei ka jingjia aksiden.
Ha katei ka jingjia aksiden, katei ka Local Taxi ka la pra hi phom ha ki bynta ba shakhmat bad katei ka Sumo ruh ka la julor hi ha ki bynta ba shakhmat.
Haba iadei bad ki briew kiba la mynsaw ha katei ka jingjia aksiden bad khamtam eh ia kito kiba shong hapoh ka Local taxi, la rah noh ia ki sha Bhoirymbong CHC na bynta ban ioh ia ka jingsumar.
Phi don ban ong eiei?