Mynsaw ki nos, ba tynrah ka bos ia ka trok

Shillong: Ha kawei ka jingjia ia takhuh kali kaba la jia ha ka 7 tarik u bnai Naitung 2021, ha ka shnong Urksew Wahpathaw hapoh Pynursla, ha ka por 3 baje janmiet eiei, kawei ka bos kaba don ia u registration nombar ML 05 R 7678 kaba kit ia ki nos kiba don hapdeng ka jingshah ai jinghikai ka la leit ban tynrah beit beit ia kawei ka trok dumper kaba don ia u registration nombar ML 05 P 9084 kaba wan na ka liang pyrshah.

Katkum ki tyllong khubor kiba la ioh lum la iathuh ba ha katei ka jingjia iatakhuh, ki la don bun ki nos kiba la mynsaw bad ia kine ki nos kiba la mynsaw la pynkit noh ia ki sha CHC Pynursla hynrei hadien kane la hap ban wanrah noh ia kine ki nos sha Shillong khnang ba kin ioh ka jingsumar kaba biang.

Katei ka bos kaba kit ia ki nos kadei kaba mih na CHC Pynursla da ka jingthmu ban wan sha Shillong bad haba poi ha Lad Myllat pat ka la leit ban tynrah noh ia katei ka trok bad ka daw jong katei ka jingiatakhuh kadei namar ba u dribar jong katei ka bos kaba kit ia ki nos u la buaid kyiad.
Kitei ki nos kiba la mynsaw ha katei ka jingjia ki dei kiba la tip kyrteng kum ka Bahunlin Basaiawmoit, ka Balahun Japang, ka Abisha Tariang, ka Donna Mary Rani bad kiwei kiwei.