Nongstoiñ: U wei u rangbah Khasi, u ba na ka shnong Mawsikar, u la mynsaw jur hadien ba u la shah shoh bad shah tied dusmon ha ki lai ngut ki Nepali, kiba dei na ka thaiñ Langpih bad u tei u rangbah mynta u don ha pdeng jong ka jingshah sumar hapoh Civil Hospital Nongstoiñ.
Ki-nongialam-ka-KSU-kiba-dang-leit-peit-ia-u-rangbah:Rupang
U tei u rangbah Khasi u ba la shah shoh dusmon ha kitei ki Nepali, u dei u Salestine Lyngdoh 45 snem bad katei ka jingjia ka la jia ha ka janmiet jong ka sngi Saitjain jong ka taiew ba la lah ha ka por kumba 6:30 janmiet, ha ka por ba u tei u rangbah u dang wan siew wan tda bad katba u dang iaid lynti ruh na katei ka jaka ba sah ki Nepali kaba don ha ka thaiñ Langpih ban leit phai sha la shnong.
“Katba nga dang wan ban thied doh na ka shnong Lawbah ki lai ngut ki Nepali, ki la wan kynsan kynsan ban shoh bad dat ia nga da kaba tied da u dieng bad hadien ba nga la kyllon ki la kura bad ka kyrdem syndon ia nga haduh ba nga sngew kumba nga la kdiah lut ki shyieng krung, hadien kata ki la rah ia nga bad ki la set haduh shimiet khlem ai bam ai dih bad ha ka sngi kaba bud ki sa pyllait noh ia nga” ong u tei u rangbah haba iakren bad ki nongthoh khubor.
Shuh shuh u tei u rangbah u la ong ruh ba um iadon kano kano ka daw bad kitei ki Nepali, hynrei u la ong pat ba kitei ki Nepali kiba la shoh ia u ki la pyrshang ruh ban shu kynnoh ia u ba u dei u nongtuh bad ha katei hi kapor ki la shu tied shu bom beit ia u haduh ban da jem jai.
Hadien ba la ioh jingtip halor katei ka jingjia na ka liang jong ka Seng Khasi Students Union West Khasi Hills District, hapoh ka jingialam jong u samla John Fisher Nongsiang President ha ka sngi ba ar jong ka taiew ki la leit ban peit ia u tei u rangbah hapoh katei ka jaka sumar ha Nongstoiñ, ha kaba ka la lap shisha ba u tei u rangbah u don hapdeng jong ka jingmynsaw bad dang shah sumar ruh ha katei ka Hospital.
Haba iakren bad ki nongthoh khubor na ka liang jong ki nongialam ka KSU, ki la ong ba na ka liang jong ka seng ka pynrem jur ia katei ka jingshoh dusmon jong ki Nepali ia u tei u rangbah bad na ka liang jong ka seng ka dawa ruh na ki bor jong ka ain ba dei kem mardor ia kiba donkti bad ka seng ka ai por ruh ba dei ban kem noh hapoh lai sngi ia kitei ki Nepali.
Shuh shuh kitei ki nongialam jong ka KSU ki la byrthen ruh ba lada ym lah ban kem hapoh katei ka lai sngi na ka liang jong ka seng kam banse ban thom ia ka sang, ia kaba ka seng kan sa leh ruh ia kaei kaba donkam pyrshah ia kitei ki Nepali, namar na ka liang jong ki ruh ki la shim ia ka ain ha ka kti jong ki bad ka jingleh jong ki ka dei ka jingleh riewkhlaw.
“Ka long kaei kaei kaba la pynsngewsih bad sngewsynei ia la ka kur ka jaidbynriew la jong haba ngi khmih bha katba nang wan ki sngi ka jaitbynriew jong ngi ka la nangshah thombor shi nang shah thombor ha ki mynder bad ngi iohi ruh ba na ka liang jong ka sorkar kam ju iada kyrpang ia ngi, ngi sakhi ia kata lyngba ka jingjia kaba la jia ha sor Shillong ha kaba na ka liang jong ka sorkar kam pat shimkhia ia kaei kaba la jia kat haduh mynta mynne bad ka jingbym shimkhia jong ka sorkar ka nang ai mynsiem shuh shuh ia ki mynder ban leh donbor” ong u President ka KSU..