Mynsaw jur u nongiaid lynti ba syllad ka kali, u nongbuaid

Nongpoh: Uwei u samla uba dang iaid lynti harud ka surok (Service Lane) ha Pahamsohthri Nongpoh, u la mynsaw jur hadien ba u la shah syllad ha kawei ka kali Mahindra Pick-up, kaba la niah da uwei u briew bad uba la buaid jawsheh.

Katei ka jingjia, ka la jia mynta ka step sngi u Blei ha ka por 11 baje ei ei mynstep, ha kaba utei u samla uba dang iaid narud katei ka surok (Service Lane), u la shah syllad ha kawei ka Mahindra Pick-up kaba don ia u number AS-01-CC-0189, kaba dei ka kali kaba thmu ban leit kit siej sha ki thain Umden.

Ia katei ka kali,, la niah da u Kermiki Sungoh bad ki briew kiba la sakhi ia katei ka jingjia, la ong ba ka dei ka jingbakla jong u nongniah katei ka kali bad nalorkata, la lap ruh ba u la buaid shaba palat ha ka por ba u niah ia katei ka kali. Ia utei uba la mynsaw la rah noh mar mar sha Bethany Hospital bad ia u nongniah jong katei ka kali, u la shah rah noh ha ki pulit ka Nongpoh Police Station.