Mynsaw jur u nongbud ba kylla ka trok kit post ding ilektrik

Nongstoiñ: Ha kawei ka jingjia aksiden kali kaba la jia myn hynnin ka janmiet kawei ka trok 12 taiar kaba don ia u number UP 15M 8373 bad kaba kit ruh ia ki nar post ding ilektrik kala kylla noh ha kawei na ki jaka kaba la tip kum ka Jaidohkroh Nongspung West Khasi Hills District.

Katkum ka tyllong khubor bala ioh la ong ba katei ka jingjia kala ha kapor kumba 2:30 PM bad la ong ruh ba katei ka trok ka dang wan na ki thain Shillong bad thmu ruh ban leit sha Riangdo mar ia poi ha katei ka jaka kala leit ban tynrah ia ka kynroh jong katei ka surok ha kaba u nongbud jong katei ka trok u la mynsaw jur.

Utei u nongbud u dei u bala tip kyrteng kum u Anil Kumar 29 snem na ka Grampipripura jong ka Itwana Diatrict UP bad la pynkit noh ia u sha NEIGRIMS Hospital Shillong katba u Omirsingh Yadav 26 snem u ba na Gramprathipur, Menpuri District UP u ba dei u nongniah u la mynsaw malu mala.
Katei ka jaka ba khyllem katei ka trok kadei ruh ha kajuh thik ka jaka kaba aksiden ka trok kaba kit ia ki nongleit jingiaseng Synod kaba la shim ruh ia ka jingim jong kiba bun ki mynsiem briew kiba shong halor ka trok.