Shillong: Ha ka 16 tarik u Kyllalyngkot 2021 kumba 1baje shiteng nohphai sngi eiei, uwei u heprit uba dang 6 snem ka rta u la shah bat bording haduh ban da mynsaw, uba dei na ka shnong Umwiehsup Pyndengumiong kaba hap hapoh ka Mairang Civil Sub-division.
Une u heprit kumba ju long man la ka sngi u la leit lehkai hakane ka madan phlang kaba don hajan ka iing sah ka jong u bad ha kane ka madan ruh la don une u transformer bad kumta ha ka jingmuja ka jong u, u la rung ha ka jaka ba buh ia une u transformer. Kiba ha ing hasem jong une u heprit ki la iathuh ha ka jingbymtip ka jong u, katba u dang ia muja ialehkai sngewbha, une u heprit ula leit rung ha poh ba buh ia une u transformer bad ha ka jaka ba buh ia une u tranformer ym shym la don ka jingkhang tala.
Na ka liang jong ki bahaing bahasem jong une u heprit uba la mynsaw ki la leit buh da ka jingujor ejahar ha Mairang Police Station bad leit ai ruh da ka jingthoh hakhmat u SDO ka MEECL Mairang ryngkat bad da jingsynran lem da ki nongialam ka HYC Mairang Circle bad ka HYC Nongthliew Circle ban dawa ia ka bai lutksan na ka bynta une u heprit ba la mynsaw.
Ia une u heprit la rah shapoh Nazareth Hospital, Shillong ha kaba u la don hapdeng ka jingshah sumar hapoh ka Intensive Care Unit(ICU).
Ha kane ka jingthoh, na ka liang ki bahaing hasem, ki nongialam ka HYC Mairang Circle, HYC Nongthliew Circle bad ka seng kynthei Umwiehsup ki la ong ba dei ban weng noh shisyndon ia u ne u tranformer na katei ka jaka bad ban buh shawei pat namar kane ka jingleh jong ka MEECL kam don shuh ka jingshngaiñ ia u khyllung kynnah ha katei ka thaiñ namar tang ka fencing ruh kam biang bad ka tala ban khang ruh kam biang. Ki la ong ruh ba lada ka MEECL kam shim khia ia kane ka mat kim banse ban peit noh da kiwei ki lad ki lynti kiba kham halor ba ioh kumno kumno ioh lashai hadien habud kan jia sa kawei ka jingjia kaba sngewsih.
Phi don ban ong eiei?