Ha ki kynta pakhang shnong ba la khot da ka HNLC, kata mynhynnin ka miet ha ka por 9:30 baje eiei uwei u pulit SI uba dei u 2nd OC ka Jowai PS uba la tip kyrteng kum u C.K Marak u la mynsaw jur, hadien ba u la shah shoh ha ki saw ngut ki briew kiba la mih kynsan na kawei ka Maruti car kaba don ia u nombar ML04 5835 bad ki khang lynti ia ki pulit. Katei ka jingjia ka la jia mynhynnin ka miet ha surok bah NH 44 Jowai Shillong Road hajan ka Challam Syngkon petrol pump, Jowai.
Ha katei ka por u SI ryngkat bad uwei u pulit langrut ki dang wan bamja da kawei ka sumo kaba la pyndonkam da ki pulit , hynrei haba la poi ha katei ka jaka, katei ka maruti ka la khang lynti kynsan ia ka sumo ba ki shong bad na katei ka maruti la mih saw ngut ki briew bad ki leit beit shaba shong u SI ha kaba ki la patan ia u shabar bad ki la bom la shoh haduh ban da jem hi jai. Hadien katto katne por u Dy. Superintendent of Police, West Jaintia Hills District, u bah P. Syiem, uba la iaid lynti na katei ka jaka ryngkat bad u nongniah kali jong u, u bah T. Neibon (constable) ki la iohi ia katei ka jingjia bad kila pyrshang ban pynsngewthuh ia kine ki samla pynban ma ki ruh kila shah ktah kti ha ka ba ki la shoh sa ia une u nongñiah kali u DSP u Bah T Neibon. Wat hadien ba u DSP u la pynjem bad pynjai jai katno katno ruh kitei ki saw ngut ki la shoh la bom hi khlem sangeh ia utei u pulit SI ka Jowai, dei tad hadien ba la wan sa shi kynhun ki pulit na Jowai ba la lah ban tem ha katei ka jingjia. La pynkit ia kiba la mynsaw shapoh hospital ha katei hi ka miet, ki pulit ki la kem ia kitei ki 4 ngut kiba la tip kyrteng kum u Ioanis Pyrtuh (28), Khailang Dkhar (19), Hami Dkhar (21) bad Mon Phawa (22) ka jingtohkit pyrshah ia ki ka la iaid shakhmat. U Khailang Dkhar bad Hami Dkhar ki dei shipara kiba na ka Shnong Khliehtyrshi West Jaintai Hills. U Mon Phawa pat dei uba ju don dak ha ki kam lute trok.
Phi don ban ong eiei?