|
Nongpoh: Kawei ka khynnah skul jong ka Alpha English Higher Secondary School, Nongpoh, ka la mynsaw jur hadien ba ka la shah lymbub ha kawei ka Sumo na Mizoram kaba don ia u number MZ 01 J 9094, mynta ka sngi ha ka por 11 baje ei ei mynstep, kaba dei ruh ka por ba ka dang mut ban kam na shilliang sha shillang ka surok na ka bynta ban leit thoh exam.
La ioh jingtip ba katei ka khynnah skul kaba la ngat ia katei ka apot la tip kyrteng kum ka Rani Rongpeit na ka shnong Umshakait bad kaba la pule Klas Eleven, haba kaba ka la shah lymbub noh ha katei ka Sumo kaba mut ban hiar sha Guahati.
Shuh shuh, la ioh jingtip ruh ba u nongniah jong katei ka Sumo tang mar ia lymbub ia katei ka khynnah skul, u la pyrshang ban phet da kaba iaid beit khlem sangeh, hynrei namar ka jingiarap da ki paidbah bad pulit kaba la pynlong ban iohkem ia utei u nongniah jong katei ka Sumo.
Ia katei ka khynnah skul kaba la mynsaw mar mar la pynkit noh sha ka jaka sumar ha Nongpoh, hynrei namar ba la jur palat ka jingmynsaw la rah noh ia ka sha NEIGHRIMS khnang ban ioh ia ka jingsumar kaba biang.
Haba iadei bad katei ka jingjia, ka Kong K. Blah, Principal jong katei ka skul, ka la pynpaw ia ka jingsngewsih halor katei ka jingjia, ka la ai ka jingkhlublei ia ki paidbah, ki nongtrei ha ki Hospital bad khamtam eh ia ki Pulit kiba la iarap has kaba kum katei ka jingjia bad sngewsih.
|