Nongpoh, 24 Risaw: Lai ngut ki briew kiba shong hapoh kawei ka kali Maruti Alto kaba don ia u number ML-05-W-5094, ki la mynsaw jur hadien ba ka kali kaba ki shong ka la leit ban rung ha khrum jong kawei ka trok kaba don ia u number AS-01-DD-9728 bad kaba ieng harud ka surokbah NH-6 bad kaba hap ha shnong Umdihar, Ri Bhoi.
Katei ka jingjia, ka la jia hynne ka step ha ka por 5:40 baje ei ei mynstep, ha kaba la ong ba katei ka kali Maruti Alto, kaba la niah da u Kynrong Dkhar, ka dei kaba don ha ka lynti ban hiar sha Guwahati, hynrei haba la poi ha katei ka jaka, katei ka Maruti Alto, namar ba ka la stet palat, nyngkong ka la leit ban tynrah ia u Divider bad hadien kata, ka la leit ban tynrah nadien jong katei ka trok kaba ieng harud surok.
Ha katei ka jingjia aksiden, sa arngut pat kiba shong hapoh katei ka Maruti Alto, kiba la tip kum u Rep Dkhar bad u Kharlong Dkhar, ki la mynsaw jur, hynrei uba la kham jur eh ka jingmynsaw dei uba niah ia katei ka Maruti Alto bad baroh kitei ki 3 ngut, ki dei na ka shnong Wapung, East Jaintia.
Ka la kham shim por ba sei ia kiba kiba la sahkut ha kali bad khamtam eh u nongniah, hynrei da ka jingiaroh ki paidbah bad ki Pulit la lah ban sei bad la pynkit noh mar mar ia ki sha Nongpoh Civil Hospital da ka kali Pulit bad Ambulance.
Kitei kiba la ngat ha katei ka apot Aksiden, ki la mynsaw jur eh, ha kaba na Nongpoh la rah noh ia ki mar mar sha ki jaka surok ha Nongbah Shillong, na bynta ban ioh ia ka jingsumar.
Phi don ban ong eiei?