Nongstoiñ: Haduh 28 ngut ki paidbah nongshong shnong jong ka shnong Umwali bad ki shnong ba marjan kaba don ha ka thaiñ Langpih ka shnong kaba don ha khappud bad ka Jylla Assam, ki la mynsaw jur hadien ba ki pulit jong ka Assam ki la wan ban bom naphang khlem da khein shuh ia ki kynthei briew bad ia ki tymmen ki kro.
Katei ka jingjia kala jia hynnin ka janmiet jong ka 14 tarik u Rymphang 2019 katba kitei ki paidbah ka shnong Umwali ki dang don ha kawei ka jaka jong katei ka shnong ban iarap ia ka jingpyntrei ia ka kam na ka bynta ka bording ilektrik kaba wan lyngba jong ka Jylla Meghalaya.
Katkum ka jingiathuh jong kiba la shah shoh la ong ba katba ki dang ia pynleit jingmut ban trei kynsan kynsan la wan ki pulit Assam bad ki la shu bom naphang beit ia ki khlem da map shuh wat ia ki kynthei briew ruh bad kila ioh kem bad rah ruh ia ar ngut ki briew na katei ka shnong.
Ia kitei ki 28 ngut la pynkit noh sha Nonglang PHC katba ia ki 16 ngut kiba la mynsaw jur la rah noh sha Civil Hospital Nongstoiñ.
Ka jingmih jong ka jingshah shoh ki 28 ngut ki paidbah ka thaiñ Umwali ha ki pulit Assam, ka dei namar ba ki la leit ban iarap ia ki nongpyntrei ia ka kam bording ilektrik ha katei ka shnong bad ka jingleit ai jingiarap ka jong ka long ban pyrshang stet ia ka kam khnang ba kin ioh pyndep ha shwa ka jingiaseng heh ka ban long ha u bnai Lber mynta u snem ha katei ka shnong.
Ha ka jingioh jingtip jong u ne u nongthoh khubor hadien ba u la hiar sha katei ka thaiñ la ong ba ka jingjia kaba nyngkong kala mih namar ba ki pulit Assam kila shoh ia u nongniah kali u ba kit ia ki tiar bording bad mar kumta hi kitei ki paidbah kiba iatreilang kila leit ban iarap hynrei kila shah tied lang haduh ba kinda mynsaw jur kynthup lang bad ki longkmie.
Hadien katei ka jingshah shoh ki 28 ngut ha ki pulit Assam bad ruh halor ka jingshah kem jong ar ngut kiwei pat, u MLA ka Rambrai Jyrngam Constituency u bah Kimfa Marbaniang u la her sha ktem pulit Assam ha Langpih bad thmu ban iakren ban pyllait ia ki ar ngut kiba la shah kem, hynrei ha pdeng jong ka jingiakren u MLA bad ki heh Pulit Assam la wan batai stad pynban da u briew paidbah kaba la pynbitar ruh ia u MLA.
Kiba mynsaw ha ka jingiakynad ha Langpih bad U MLA ka Rambrai, u Bah Kimfa Marbaniang uba dang ia pyni nia bad ki pulit Assam: Rupang
Katei ka jingbatai stad utei u riew paidbah ia u MLA ka la pynmih ruh sa ka jing kynnoh, ia u MLA ba u dei u ei, ba u leit batai stad ha khmat ha khmat bad u la pyrshang ruh ban kren da ka Nepali bad ong ruh artad ba u dei u Nepali bad mar iamih ka ktien Nepali ha katei ka por hi kala mih ka jingkhynwin bad kitei ki briew ki la woh daw da kaba ong balei me ong Nepali bad byrngem byrsit ruh ia u MLA ha ryngkat ka jingiakdew kti bad jingiaheh nia kaba la neh kumba 15 minit eiei.
Ym tang katta katei ka jing ia bun ktien ha katei ka jaka ka la nang jur nang jur bad kala jan mih ruh wat ka jing ktah kti, watla ki pulit ka Assam bad ki pulit ka Jylla Meghalaya kiba leit ban bud ia u MLA ki ia don lang bad hadien kane na kaliang jong u bah Kimfa u la mih noh na katei ka jaka ha ryngkat ka jingthmu ban leit ban ujor ruh da ka jing ujor, ha kaba iadei bad katei ka jingleh jong ki pulit ka Assam.
Phi don ban ong eiei?