Mynsaw jur 2 ngut, ha ka jingjia aksiden kali ha shnong Umnget

Nongpoh: Ha kawei ka jingjia aksiden kaba la jia hynnin ka miet sngi Saitjain ha ka por 12 baje ei ei ha surokbah NH-6 kaba hap hapoh ka shnong Umnget, u nongniah bad nongbud jong kawei ka trok kaba don ia u number AS-01-KC-5714, ki la mynsaw, kata ka la jia hadien ba ka kali jong ki, ka la kum leit tynrah na khmat jong kawei pat ka kali kaba wan na kawei ka liang.

Katei ka trok kaba la leit tynrah ia katei kawei pat kaba wan na kawei ka liang, ka dei ka trok kit jhur, kaba wan na Guwahati da ka jingthmu ban leit sha Silchar, hynrei haba la poi ha kawei ka jaka ba kham long khongdon ha Umnget, katei ka trok ka la ryngkang ia u (Divider) ka surokbah NH-6, ha kaba ka la leit tynrah beit nakhmat jong kawei ka trok thylli kaba don ia u Number AS-01-FC-8950, kaba la niah da u Saila Muktieh (37).

U nongniah jong katei ka uba la tip kum u Nijam Ali (34) lem bad u nongbud, ki la mynsaw jur na katei ka jingjia aksiden la pynkit noh mar mar sha Umsning CHC, hynrei namar la jur pat ka jingmynsaw, kumta la rah noh ia ki sha ki jaka sumar ha Nongbah Guwahati.