Mynsaw jur 1, ba iatyngkhuh ka thuk thuk bad ka Innova ha Umling

Nongpoh: Ha kawei ka jingjia aksiden kali kaba la jia hynnin ka sngi u Blei hapoh ka surokbah NH-6 bad kaba hap hapoh ka shnong Umling, u nongniah lem bad uwei uba shong hadien jong kawei ka thuk thuk kaba don ia u number AS-01-FG-7651, ki la mynsaw, hadien ba katei ka Bike ba ki shong, ka la iatyngkhuh bad kawei ka kali Innova kaba don ia u number ML-05-AA-9408.

Katei ka jingjia, ka la jia ha ka por 4 baje ei ei janmiet, ha kaba katei ka thuk thuk kaba thmu ban hiar sha Guwahati, ka la tyngkhuh bad katei ka Innova kaba thmu ban kiew sha Shillong bad katei ka jingjia, ka la jia ba ka jingpyniaid kali hapoh ka surokbah, la pyniaid ia ki kali tang na kajuh ka liang surok, namar ba ka don ka jingtan ia kawei ka Trok kaba la hap sha riat.

Ha katei ka jingjia aksiden, u nongniah jong katei ka thuk thuk, u la khang mynsaw jur, ia kaba la pynkit noh mar mar ia u sha Nongpoh Civil Hospital.