Mynsaw hynriew ngut, ba iatyngkhuh kali ha Surok Shillong By-Pass

Nongpoh: Haduh hynriew ngut ki briew kiba la mynsaw, na ka jingjia tyngkhuh kali kaba la jia hynnin ka nongphaisngi ha ka por 2 baje ei ei, ha ka surok Shillong By-Pass bad kaba hap hapoh ka shnong Umroi Mawpun.

Katei ka jingiatyng khuh kali, ka dei hapdeng artylli ki kali kamai, kaba kynthup ia kawei ka Tourist Taxi, Maruti Alto 800 kaba don ia u number ML 05R-9108, ia kaba la niah da u George Dohling bad kawei ka Tata Nano kaba don ia u number ML 10A 7143, kaba la niah da u Kyrshan Marwein.
Tang mar ia tip halor katei ka jingjia, ki Pulit ka Umiam ki la poi sha katei ka jaka, na ka bynta ban leit ai jingiarap ia kiba la mynsaw, kumta na kitei ki 6 ngut kiba la mynsaw, la don ruh kiba la kham mynsaw jur, ia kaba la pynkit noh mar mar sha ka CHC kaba don ha Bhoirymbong.