Shillong: Haduh 7 ngut ki nongshong shnong ka Mawleiñ -Mawkynrew kiba kynthup ia ki 4 ngut ki longkmie, kawei ka longkmie armet bad 2 ngut ki shynrang ki la mynsaw na ka jingshah tied lathi bad kawang tear gas ha ki pulit ha ka shnnong Mawkynrew – Mawleiñ mynta ka sngi.
Kane ka huri hura kaba mih ha kane ka shnong ka long hadien ba ki nongshong shnong ki ar tylli ki Dorbar shnong kata ka Mawkynrew -Mawleiñ ki la mih ban pyrshah halor ka jingioh jaka ka Ram krishna Mission ban thaw ia ka ingskul ha kane ka jaka khlem tip ki dorbar shnong, kaba thmu ban pynlong ka jaka Madan phutbol. Ha kane ka sngi na ka liang ki pulit ki bom lathi bad kawang lyer pynsat khmat ia ki paidbah, hadien ba mih ka jingthombor ki paidbah na ka jingthmu ki nongshong shnong ban thung ia ki dieng kol ha kane ka madan. Haba kren na ka liang u Sordar barim ka Mawleiñ u bah P Wankhar u la iathuh ba ka jingtur ki paidbah ka long da ka jingjaijai ban pyrshah halor ka jing ai jaka u acting Sordar ia ka jaka sha ka Ram krishna Mission ban tei ing skul ha kane ka jaka.
“Ha u snem 2013 ki ar dorbar shnong jong ka Mawkynrew bad Mawleiñ ki la dep ban iati ia kane ka jaka sha ka Sport club na ka bynta ban kyntiew ia ki samla ialehkai na kane ka dong ka thain, hynrei na ka liang u Acting Sordar bad ki briew jong u, u la ai sha ka Ram krishna Mission khlem ka jingtip ki nongshong shnong” u la ong.
U la bynrap “Kane ka dei ka jaka jong ki Dorbar ar shnong jong ka Mawkynrew bad Mawleiñ bad na ka liang ki paidbah kumba la ai sha ka Sport club, namar kam pat don ka jingpynduh ia ka rai dorbar 2013 kumta ngi kwah ba kan neh beit kumjuh khnang ba kan pynbha ban kyntiew ia ki khun samla ka dong ka thain”.
“U Acting Sordar, u la kam trai lut ia ki jaka ki ba hap hapoh Mawkynrew Mawleiñ ki ba hap hapoh ka jingsynshar jongu, hynrei ki paidbah hi kin ym ailad ban kam trai ia ka hok u paidbah bad ha ka khyndew Ri Raid ym lah ban ai shano shano ruh”la ong u Sordar barim.
U bah Wankhar u la iathuh ruh ba naduh ba sdang hi, haba la mih ka jingpyrshah, na ka liang u BDO u la kular ban pynsangeh na baroh ar liang, hynrei na ka liang jong kiwei ki kynhun ki bteng ka jingpyntrei ha kane ka jaka kaba paw ia ka jingkheinbein jong ki ia ki trai shnong namar lada ki sangeh ki nongshong shnong ruh ki hun ban ap ia ka rai ka ingbishar halor kane ka bynta.
U la iathuh shuh shuh ba na ka liang ki nongshong shnong hi ki la dep ban ujor sha ka KHADC halor ka jingthombor u Acting Sordar, hynrei haduh mynta kam shym don kano kano ka jingshimkhia halor kane ka bynta.
Na ka liang u wei u nongshong shnong u la ong ba ka long kaba i saitmet ban phah ia kum kine ki pulit sha ki shnong kiba hapoh ka Jylla bad buh ka jingkylli ba balei kim phah sha ki thain khappud. Ki pulit kiba wan ban pynmynsaw hapoh shnong bad u BDO ruh tang shitroh ka jaka ha Mawkynrew ym ithuh u wan tuklar hangne nyngkong u la ong ba un pynsangeh baroh ar liang, hynrei balei kim burom bad wanrah da ki pulit ban pynmynsaw.
Ha kaba iadei bad kane ka jingjia na ka liang ka ophis District Magistrate ka East khasi Hill District lyngba ka Kong RM Kurbah (IAS) hapoh ka section 163 BNSS ka la pynjari da ka curfew ha ka shnong Mawkynrew, da kaba kdew ba la ioh jingtip halor ka jingpynthut ha ka shong suk shong shngain ha ka shnong Mawkynrew, kaba hap hapoh ka Madanryting Police Station.
Phi don ban ong eiei?