Mynsaw 7 ngut ki nongkitkam ka seng Congress, ba ia huri hura bad ki nongkyrshan ka seng NPP

Shillong: Kumba hynñiew ngut ki nongkitkam ka seng Congress ki la mynsaw jur hadien ba ki kali ba ki shong ki la shah kawang maw na ka ïing jong uwei u nongkyrshan ka seng National People’s Party(NPP) kaba la jia ha ka janmiet jong ka 27 tarik u bnai Risaw 2021 kumba 4:15 baje eiei hajan ka shnong New Bhaitbari.

Katkum ki khubor ba la ioh lum, la iathuh ba kitei ki hynñiew ngut kiba la mynsaw ha katei ka jingjia ki dei kiba dang wanphai na ka jingialap elekshon jong ka seng Congress kaba la long ha Rajabala bad kaba la pynlong ruh ia ki laitylli ki kali jong kitei ki briew ka seng Congress ba kin julor ha kane ka jingshah kawang maw. Halor kane ka jingjia, na ka liang kitei ki briew kiba la mynsaw ki la ujor noh da ka ejahar pyrshah ia kiba la donkti ha kane ka kam bad haduh kumba 24 ngut ki kyrteng kiba la pynmih ki dei kiba la suba ba ki donkti ha kane ka jingkawang maw kaba la jia ha ki thaiñ jong ka shnong Garodubi bad Magurmari.

Ha katei ka ejahar ba la ujor da u Congress election agent, u Abdul Aziz u la ong ba ynda ki la poi ha Garodubi, la don ba kawang maw kynsan ia ki da kitei ki kynhun ka NPP kaba la wanrah ia ka jingmynsaw kaba jur bha ia ki nongkitkam ka seng Congress ha kaba kumba laitylli ki kali ki la julor ha kane ka jingshah kawang maw. Kitei ki kynhun ki la rahbor ruh ia ki briew ka Congress kiba don hapoh ka kali bad ki la bom la tied ia ki ha kaba ki la don katto katne ruh kiba la mynsaw na ka bynta ka khlieh ruh. U Aziz u la iathuh ruh ba ki la don katto katne ki nongkitkam ka seng Congress kiba lah jahrngai bad la suba ba ki la shah pyniap ha kitei ki kynhun.

U Dr Mizanur Kazi u ba dei u nongialam ka seng Congress na ka thaiñ, u la ong, “Katei ka jingthombor ka dei kaba khlem don daw bad ka pyni pynban ia ka jinglehdonbor jong ka seng NPP. Ynda ki la poi hajan ka ïing jong uwei u briew u ba kyrteng u Hasan Ali, ka la don jingkawang maw kynsan ia ki. Hadien katto katne por, ki la don ki briew kiba napoh ïing jong u Hasan kiba la tan ia ki nongkitkam jong ngi bad ki la shah la dat beit ia ki”.
U Kazi u la iathuh ruh ba hadien katei ka jingshah thombor la pynkit noh ia kitei kiba mynsaw sha ka jaka sumar ba kin ioh ia ka jingsumar. U Kazi u la ong ruh, “Ngi la pyntip ia ki pulit halor kane ka jingjia bad ki la pynbiang da ki bor pahara ha kane ka jaka. Kum kane ka jingleh kaba palat dei ban pynrem jur bad dei ban leh eiei halor kane katkum ka aiñ”.