Mynsaw 5 ngut shi ing ba tynrah ka trok harum Pynursla

Shillong,
26 Nailur:
Katba dang wan shim dawai na Pynursla, ki shi ing shi sem ki la thmu ban leit phai noh sha la ka jong ka shnong ka Nongkyndah , Pynursla hynrei ha shiteng lynti ka jingjia ba sngewsih ka la wan lap ia ki ha kaba ka kali Alto ( Tourist), ha kaba kitei ki shiing ki shong ka la shah tynrah ha kawei ka trok kaba dang wan na ki thain Dawki bad katei ka jingjia ka la jia ha kawei ka khongdong bah kaba don harum Pynursla, Lad Mawlyndun.
Namar ba ka dei ka jaka ba ki network mobile kim long bha , ym don lad ban phone Ambulance lane 108 ban pynkit ia ki sha Hospital hynrei donbok ba ha katei ka por ba ki 3 ngut ki kynthei kiba la mynsaw jur ki la donkam jingiarap kyrkieh ka la wan lap ka kali kit khubor u Rupang ( PRESS) kaba dang wan buh khubor sha Dawki bad mar-mar marsien iohi ia katei ka jingjia u nongniah katei ka kali kit khubor u Bah Hep Lyngdoh u la iarap ia kitei kiba la mynsaw ban pynkit ia ki sha CHC Pynursla na ka bynta ba kin ioh ka jingsumar. Khlem da pynslem marsien poi ha CHC la ai jingiarap ia kitei kiba la mynsaw kiba kynthup ia 3 ngut ki kynthei bad ki 2 ngut ki shynrang.
Ha katei ka jingjia aksiden, ki la don haduh 9 ngut kiba mynsaw kiba shong ha katei ka kali kynthup ia ki kynthei , rangbah bad iwei i khyllung. Katei ka jingjia ka la jia ha ka por 11:20 baje mynstep.