Mynsaw 4 ngut ki dkhot ka seng UHM, ba shah shoh ha Saba

Shillong: Ha kawei ka jingjia kaba la jia mynta, ka sngi thohdieng kata ka 23 tarik u Iaiong 2021, kumba sawngut eiei ki dkhot jong ka United Hynniewtrel Movement(UHM), ki la shah thombor ha ki jaitbynriew Karbi, da kaba ki la shah mait da ka wait bad da ki nar rod katba ki dang leit ban jurip ia kawei ka police outpost kaba la shna beaiñ da ki pulit Assam ha ka shnong Saba kaba hap hapoh ka Thadlaskein Block jong ka West Jaiñtia Hills District.

Katkum ki tyllong khubor kiba la ioh lum, la iathuh ba kine kiba shah thombor bad mynsaw ki kynthup ia u Bah K Nongbri u ba dei u Organising Secretary ka Sengkmie, u Bah Lakhon Shylla u ba dei u Organising Secretary jong ka East Jaiñtia Hills District bad ki dkhot jong ka seng kiba kynthup ia u Bah P Dkhar, u Bah M Malang bad u Bah S Dkhar. Ia kine kiba la mynsaw la phah sumar noh ha Barato PHC.

Haba kren sha ki lad pathai khubor, u Organising Secretary jong ka seng UHM, u la ong, “Na ka liang jong ngi ka seng UHM, mynta ka sngi ngi la hiar shaduh kata ka jaka ba ka Assam ka wan buh ia ka Police Outpost bad ngi la ia mynsaw mynta ka sngi, namar ha ka jingleit ka jong ngi ka long tang ba ngin leit jurip bad leit iakynduh lada ka jia shisha ne em, ka long shisha ne em ba ia kata ka jingshna ia ka Police Outpost ha ka jaka ka khyndew ka shyiap kaba dang hap hapoh ka jylla Meghalaya. Ynda ngi la poi hangtei ka long kaba shisha ba ki la shna kumta, hynrei ngi khlem ia jrong kti bad ngi khlem ia rah tiar eiei, ngi shu leit iakren beit tang da ka ktien. Na ka liang jong nga u Organising Secretary Central Body nga la ioh ia ka jingtip lyngba ka West Jaiñtia bad ka East Jaiñtia District, ngi la hiar lang ryngkat bad u Sordar jong ka Saba, ngi sa khie lang ia kane ka jingshisha. Te ynda ngi la leit, ki don ki jaitbynriew na ka liang jong ka jaitbynriew Karbi kiba la wan mih ia ka ban rah da ki wait, da ki dieng khlem da shah ia ngi ba ngin iakren ia kaei kaba ngin iakren bad la shu beh bad beh thong ia ngi bad la shu bom ia ngi. Kumta ngi lah hap ban shu phet krad ha ka jingleit tang khyndiat namar ngi khlem thmu ban leit ia thma hynrei ka jingthmu jong ngi ka long ia ka ban leit jurip khnang ba ka shongsuk ka shongsaiñ kan wan ha ka pateng lane hadien habud jong kine ki dong ki thaiñ shane. Ngim shim la dei kita ki sengbhalang kiba wan pynklumar ne kiba kwah burom hynrei ngi dei ki sengbhalang kiba kwah ban iada ia ka khyndew ka shyiap bad ia u pud u sam. Ngi da pynrem jur ia kane ka jingleh riewkhlaw ki bym da sngewthuh shuh para nongshong shnong ha ka Ri India bad ngi da pynrem jur ia ki nongshim kabu kiba kum kine wat hakhmat jong ki pulit jong ka Assam kim lah ban tehlakam ia kiba don hangto, ki don ki pulit Assam wat u shiklur jong ka Assam u don lang hynrei u khlem lah ban tehlakam bad ki la beh thong ia ngi kumba beh ia ki mrad ki mreng. Te kane ka long ka kyrwoh lyngba jong nga u Organising Secretary.”