Mynsaw 2 ngut ki BSF, ba pynbthei bom ka GNLA

Shillong, 31 Lber:
Ar ngut ki shipai BSF ki la mynsaw malu mala na ka jingbthei u bom IED ba la leh da ka GNLA mynta ka sngi por kumba 1:30 baje eiei janmiet.
Katkum ka khubor na ki pulit, ka kynhun jong ka GNLA hapoh ka jingialam u Hadeo Ch Momin ki la leh ia kane ka kam ha surok Khera para kaba don hajan ka Tura. 
Namar kane ka jingbthei u bom IED, ka iit kali jong ki BSF ka la pra bad ar ngut ki la mynsaw.
Ki BSF ki la iakyn duh ia kane ka jingjia katba ki dang wan phai na ka thain Dalu sha Tura.
Ia kine ki BSF la rah sha Dispensary, ha Dobasipara ban tah ia ka jingmynsaw.
   Mar mar hadien ba la ioh ia kane ka jingtip, ki pulit pynlip bom na Tura ki la mareh bran bran sha katei ka jaka.
Ki pulit pynlip bom ki la lap ba u bom ba bthei u dei IED (intensive explosive device). 
Na ki dak ki shin, la ithuh ba ia une u bom la pynbthei na jngai. U Hadeo Ch Momin bad ka kynhun jong ka GNLA ki dei kiba leh ia kane. Ki BSF ki la ujor ejahar halor kane ka jingjia.