Mynsaw 2 ngut, ba leit tynrah ka bike, nadien ka trok ha 17mer

Nongpoh: Ha kawei ka jingjia aksiden kaba la jia hynnin ka sngi ha ka por 2:15 baje ei ei janmiet ha surok NH-6 bad kaba hap hapoh ka shnong 17mer ha Ri Bhoi, ar-ngut ki briew kiba la shong ha kawei ka bike, ki la mynsaw jur, kata hadien ba katei ka bike kaba ki shnong, ka la kum leit ban tynrah beit nadien jong kawei ka trok.

Katei ka bike kaba don ia u number ML 10B 2115, ka dei kaba kaba la niah da u Hosbert Makri, kiba la mih na Plasha da ka jingthmu ban leit donkam sha ki thain Byrnihat, hynrei haba ki la poi ha katei ka jaka, la ong ba katei ka bike ka la leit tynrah beit nadien jong ka trok, kaba la wanrah ia ka jingmynsaw bad ruh katei ka bike ka la julor.

Ia u nongniah jong katei ka bike lem bad ia u paralok jong u, kiba la mynsaw na katei ka jingjia aksiden, la pynkit noh mar mar sha Byrnihat CHC na ka bynta ban ioh jingsumar. La ong ba ka daw kaba la pynlong ia katei ka jingjia aksiden, ka dei namar ba u nongniah jong katei ka bike u la pynher stet palat bad u bym lah shuh ban tehlakam ia ka bike kaba u niah, kaba la pynlong ruh ba katei ka bike kan leh tynrah nadien jong katei ka trok.