Shillong:U Bah Pratlynti Rynjah(35) uba na Laitlyngkot, uba dei u nongdie doh sniang ha Umsohsun, ula mynsaw mynta ka sngi, na ka jingshah kawang maw na ki bynta jong ka khlieh, katba u dang shong ha ka dukan die doh jongu. Katei ka la jia ha ka por 12.30 nohsngi mynta ka sngi. Ym tang katta, ynda haba ula mih na katei ka dukan, ula shah bat sa ha ki pulit bad ula shah bom, na sha ki bynta jong ka kjat bad la pynkit noh sha Civil Hospital, Shillong. U bah Rynjah, u dei ban leit phai hynnin ka sngi sha la shnong, hynrei, namar ba um ioh kali shuh, kumta ula sah miet noh ialade ha katei ka dukan, ha kaba ula mad pynban ia katei ka jingjia ba sngewsih.
Ki paidbah kiba ia lum lang bad kiba dang hiar sha ki thain Mawlonghat, ha ka janmiet jong ka Sngi Thohdieng:Rupang
Kiwei pat kiba mynsaw mynta ka sngi, ki long U bah Donkupar Dympep, uba dei U Organising Secretery ka FKJGP, Mawlai Circle bad nangta sa U bah Nicky Don (24) na Bishop Fall, Mawprem. Kitei ki mynsaw na ki bynta jong ki kjat, na ka jingrung ki phliah ding aluminium bad ki shah sumar ha Robert Hospital. Ki don sa arngut kiwei pat kiba mynsaw bad kiba shah sumar ha Robert Hospital, tangba kim shym la kwah satia ban ai kyrteng. Uwei na kitei u dei uba shah ther maw na shyllang bad uwei pat dei uba rung ka lyer sat khmat ha ki bynta jong ka shadem. La iathuh ba ki pulit ki don kumba 5,6 ngut kiba mynsaw bad uwei na kitei, u dei uba shah siat da u maw najan pyllew mat.
Kitei ki jingjia haneng, ki dei kiba la jia hapoh ka por 3baje nohsngi bad hadien jong katei ka por, ki dang don shuh sa shibun ki jingjia, kiba une u nongthoh khubor, um pat ioh lum satia.